काठमाडौं (हाम्रो खेलकुद) – नेपालमा पहिलोपटक क्लबस्तरीय ‘क्वीक बास्केटबल’ होम एण्ड अवे डबल राउण्ड रोविन लिग हुने भएको छ ।

आयोजक प्ले फर डिप्राइभ्ड चिल्ड्रेन नेपाल (पिडिसिएन) ले राजधानीमा पत्रकार सम्मेलनको आयोजना गर्दै डेढ महिनासम्म चल्ने होम एण्ड अवे डबल राउण्ड रोविन लिग बास्केटबलबारे जानकारी गराएको हो । शनिबारबाट शुरु हुने प्रतियोगिता चैत १७ गतेसम्म ९ स्थानमा हुनेछ । यसैबीच आयोजकले लिगको सम्पूर्ण तयारी पूरा भएको जानकारी गराएको छ ।

लिगमा सहभागी ८ टिमले होम एण्ड अवेको आधारमा एकआपासमा दुई–दुई खेल खेल्नेछन् । लिगमा कुल ६० खेल हुनेछ । लिगमा साउथ साइडर्स, टिम बुढानिलकण्ठ नगरपालिका, हिमालयन हङ्स, गोल्डेनगेट कलेज, त्रिभुवन आर्मी क्लब, जेभियर कलेज, कीर्तिपुर बास्केटबल टिम र विशाल मिलन केन्द्रले सहभागिता जनाएका छन् । पिडिसिएनका अध्यक्ष अरुण कार्कीले लामो समयसम्म बास्केटबल खेलिरहेका टिमलाई लिगमा समावेश गरिएको बताए ।

लिगमा हरेक टोलीले तीनजनासम्म विदेशी खेलाडी राख्न पाउने तर, प्लेइङ फाइभमा एक जनामात्र खेलाउन पाउनेछ । लिगको अंकतालिकाको शीर्ष चारमा रहने टोलीले प्ले अफमा स्थान बनाउनेछन् । प्ले अफको शीर्ष टोलीले चौथो हुने टिम तथा दोस्रो र तेस्रो टोलीसँग फाइनल प्रवेशका लागि खेल्नेछन् ।

प्रतियोगितालाई चौधरी ग्रुपको क्वीक्सले मुख्य प्रायोजन गरेको छ । चौधरी ग्रुपको क्वीक्सका प्रमुख लालबाबु प्रसादले यसअघि चौधरी ग्रुपकै उत्पादन वाई वाई चाउ चाउले क्रिकेटलाई प्रायोजन गरेको बताउदै क्वीक्सले बास्केटबललाई माथि उठाउन प्रायोजन गरिएको बताए । नेपाल बास्केटबल संघका अध्यक्ष लामा टेण्डी शेर्पाले यस लिगलाई संघले प्राविधिक सहयोग गरेको र यो लिगलाई अहिले परिक्षणको रुपमा लिइएको बताए ।

नेपाली राष्ट्रिय टोलीको पुरुषतर्फको कप्तान सदिश प्रधानले यसअघि छोटो फर्म्याटमा विभिन्न प्रतियोगिताहरु खेलेपनि यस्तो खालको प्रतियोगिता नेपालमा आवश्यक रहेको बताए । महिला टोलीकी कप्तान सदिना श्रेष्ठले पुरुषबाट शुर भएको लिग महिलामा पनि हुनुपर्ने बताईन् ।

प्रतियोगिताको विजेताले २ लाख रुपैया प्राप्त गर्नेछन् । दोस्रो हुने टोलीले १ लाख ५० हजार प्राप्त गर्ने आयोजकले जनाएको छ । प्रतियोगिताको उत्कृष्ट खेलाडी, सर्वाधक स्कोरर, डिफेन्स, इमर्जिङ खेलाडी र प्रशिक्षकले एन्टामार्फत १० हजार रुपैया बराबरको उपहार प्राप्त गर्नेछन् । २८ खेलको म्यान अफ दि म्याचले केटिएम सिटीबाट हजार बराबरको उपहार प्राप्त गर्नेछन् । प्रतियोगिताको पहिलो दिन त्रिभुवन आर्मी क्लब र विशाल मिलन केन्द्रबीच खेल हुनेछ । खेल त्रिपुरेश्वरस्थित राष्ट्रिय खेलकुद परिषदको कवर्डहलमा हुनेछ ।