काठमाडौं (हाम्रो खेलकुद) – उपाधिको दावेदार विभागीय त्रिभुवन आर्मी क्लबले राजधानीमा शनिबारबाट शुरु भएको ‘होम एण्ड अवे’ क्वीक्स बास्केटबल लिगमा विजयी शुरुवात गरेको छ ।
त्रिपुरेश्वरथित राष्ट्रिय खेलकुद परिषद (राखेप) को कवर्डहलमा शनिबार भएको उद्घाटन खेलमा आर्मीले विशाल मिलन केन्द्रलाई ८७–७३ को स्कोरमा पराजित गर्दै लिगमा विजयी शुरुवात गरेको हो । पहिलो क्वार्टरमा २४–११ को सहज अग्रता बनाएको आर्मीले दोस्रो क्वार्टरमा भने १९–१७ को झिनो अग्रता लियो ।
तेस्रो क्वार्टरमा भने, आर्मी १६–२५ ले पछि पर्दा निर्णायक सेटमा २८–२० को जत निकाल्न सफल भयो । आर्मीको जितमा विनोद महर्जनले २४ अंक जोडे । कप्तान सदिश प्रधानले १६ अंकको योगदान दिए । विशाल मिलन केन्द्रका विकास गुरुङले २२ अंक जोडेपनि टिमलाई जिताउन सकेन ।नेपालमै पहिलोपटक भैरहेको होम एण्ड अबे लिगमा आइतबार कीर्तिपुर बास्केटबल क्लबले हिमालयन हङ्ससँग खेल्नेछ ।
