काठमाडौं (हाम्रो खेलकुद)-नेपाली बास्केटबल इतिहासकै सबैभन्दा लामो र ठूलो प्रतियोगिता नेपाल बास्केटबल लिग (एनबीएल) को प्ले अफका खेलहर आइतबारदेखि आयोजना हुने भएको छ ।
आयोजक प्ले फर डिप्राइभ्ड चिल्ड्रेन नेपाल (पिडिसिएन) ले शुक्रबार राजधानीमा पत्रकार सम्मेलनको आयोजना गर्दै प्ले अफका खेलहरु असार १ गतेबाट ३ गतेसम्म हुने जानकारी गराएको हो ।
विभिन्न ८ टोलीले सहभागिता जनाएको लिगमा विभागीय त्रिभुवन हार्मी क्लब, दि टाइम्स इन्टरनेसनल क्लब, गोल्डेनगेट इन्टरनेसनल क्लब र नेपाल पुलिस क्लबले शीर्ष चारस्थानमा रहँदै प्ले अफमा स्थान बनाउन सफल भएको थियो ।
बेस्ट अफ थ्री का आधारमा हुने लिगको शीर्ष दुई टोलीले ३ खेल खेल्नेछन् । प्लेअफमा आर्मी र टाइम्सले बेस्ट अफ थ्रीका आधारमा पहिलो क्वालिफायर खेल्नेछन् जसबाट विजयी टोली सिधै फाइनल प्रवेश गर्नेछ ।
तेस्रो गोल्डेनगेट र चौथो पुलिसले बेस्ट अफ थ्रि एलिमिनेटर खेल्नेछन् र विजयी टोलीले पहिलो क्वालिफायरको पराजित टोलीसँग फाइनल प्रवेशका लागि दोस्रो क्वालिफायर खेल्नेछ । दोस्रो क्वालिफायर पनि बेस्ट अफ थ्री कै आधारमा खेलाइनेछ । फाइनलमा एक खेल मात्र हुनेछ ।
प्लेअफ र फाइनलका सबै खेलहरु राष्ट्रिय खेलकुद परिषदको कभर्ड हलमा खेलाइनेछ । प्रतियोगितामा पहिलो र दोस्रो हुने टोलीले क्रमशः दुई र एक लाख रुपैयाँ प्राप्त गर्नेछन् । प्रतियोगिताका मोस्ट भ्यालुएबल प्लेयर र हाइएस्ट स्कोररका लागि पनि उचित पुरस्कारको व्यवस्था गरिएको आयोजकले जनाएको छ ।
पुरुषतर्फको लिग गत १४ बैशाखबाट तथा महिला लिग २० जेठबाट शुरु भएको थियो । पुरुष र महिलाको फाइनल ७ असारमा हुनेछ । महिलातर्फ भाटभेटेनी समृद्धि गोरिल्लाज र नेपाल पुलिस क्लब फाइनलमा प्रवेश गरेका छन् । महिलातर्फ चार टोलीले होम एण्ड अवेका आधारमा प्रतिस्पर्धा गरेका थिए ।
