काठमाडौं (हाम्रो खेलकुद) – नेपाली राष्ट्रिय बास्केटबल टोली १३ औं दक्षिण एसियाली खेलकुद (साग) अन्तर्गत पुरुष बास्केटबलको सेमिफाइनलमा प्रवेश गरेको छ ।
आइतबार दशरथ रंगशालास्थित कभर्ड हलमा नेपालले माल्दिभ्सलाई ७६-६२ ले पराजित गर्दै अन्तिम चारमा स्थान पक्का गरेको हो । पहिलो क्वाटरमा खेल केहि प्रतिस्पर्धात्मक रहेपनि नेपालले त्यसपछि खेलमा पकड जमाउँदै जित पक्का गर्यो ।
पहिलो क्वाटरमा १८-१७ को स्थितिमा रहेको खेलमा नेपालले दोस्रो क्वाटरमा भने एकपक्षीय प्रदर्शन गर्यो । दोस्रो क्वाटरको अन्त्यमा नेपाल ४१-२९ ले अगाडि रहयो । तेस्रो क्वाटरमा ५८-४० ले अगाडि रहेको नेपालले अन्तिम क्वाटरमा अग्रता कायम राख्दै जित पक्का गर्यो ।
अघिल्लो खेलमा बंगलादेशसँग पराजित भएको नेपाल समूह उपविजेताका रुपमा सेमिफाइनलमा पुगेको हो । अब नेपालले फाइनल प्रवेशका लागि भारतको सामना गर्नेछ । सेमिफाइनलका खेलहरु सोमबार हुनेछन् ।
