काठमाडौं (हाम्रो खेलकुद)

लामा टेन्डी शेर्पा लगातार तेस्रो पटक नेपाल बास्केटबल संघको अध्यक्षमा निर्वाचित भएका छन् । राजधानीमा शुक्रबार भएको साधारण सभाले शेर्पासहित ११ सदस्यीय कार्यसमितिको निर्वाचिध चयन गरेको हो ।

राष्ट्रिय खेलकुद परिषद् (राखेप) का उपाध्यक्ष समेत रहेका शेर्पा नेपाल ओलम्पिक कमिटी (एनओसी) का महासचिव हुन् । सन् २००५ मा उपाध्यक्षबाट बास्केटबल संघमा प्रवेश गरेका शेर्पा २००७ मा पहिलो पटक अध्यक्ष बनेका थिए । केन्द्रीय कार्यसमितिमा होमबहादुर दोङ वरिष्ठ उपाध्यक्ष तथा सोमबहादुर राई उपाध्यक्षमा चुनिए ।

अघिल्लो कार्यसमितिमा उपाध्यक्ष रहेका नरेन्द्र थापाले महासचिव, फनिन्द्रमान श्रेष्ठले सचिव र विष्णुहरि त्रिपाठीले कोषाध्यक्षको जिम्मेवारी पाएका छन् । पवनकुमार थापा, राजकुमार महर्जन, निरञ्जन सत्याल, बसन्तराज गिरी र सरोजा कोइराला सदस्यमा चयन भए । बास्केटबल संघको शुक्रबार बसेको बैठकले भीमसिं गुरुङ, जुम गुरुङ र सुरज लामालाई उपाध्यक्षमा मनोनित गरेको छ ।

एनओसीका अध्यक्ष जीवनराम श्रेष्ठ, राखेपका सदस्य उपेन्द्र पौडेल र एनओसीका उपाध्यक्ष पुरेन्द्रविक्रम लाखेले प्रमाणपत्र प्रदान गरेका थिए । साधारणसभामा विभिन्न १६ जिल्लाबाट २-२ जना गरि ३२ तथा केन्द्रका १३ गरी ४५ जना प्रतिनिधिको उपस्थिति थियो ।