काठमाडौं (हाम्रो खेलकुद) – तीव्र गतिका बलर करण केसीको उत्कृष्ट बलिङको सहयोगमा नेपाल तेस्रो अभ्यास खेलमा श्रीलंका पुलिससँग फराकिलो जित नजिक पुगेको छ ।

नेपालले प्रस्तुत गरेको ३ सय ३२ रनको विशाल विजयी लक्ष्य पछ्याएको श्रीलंका पुलिस २१ ओभरमा ७ विकेट गुमाउँदै ७९ रन बनाएको छ । नेपालका तीव्र गतिका बलर करण केसीले ४ विकेट लिएका छन् । सागर ढकाल र कमलसिंह ऐरीले १–१ विकेट लिएका छन् ।

त्यसअघि टस जितेर पहिला ब्याटिङ थालेको नेपालले निर्धारित ५० ओभरमा ७ विकेट गुमाउँदै ३ सय ३१ रन बनाएको थियो । नेपालका युवा ब्याटर रोहित कुमार पौडेल, आसिफ शेख, कुशल भुर्तेल र करण केसीले अर्धशतकीय इनिङ खेले । तेस्रो नम्बरका युवा ब्याटर रोहित कुमार पौडेलले सर्वाधिक ७२ रनको योगदान दिए ।

नेपाललाई ओपनर आसिफ शेख र कुशल भुर्तेलले उत्कृष्ट सुरुवात दिलाएका थिए । कुशल ५७ र आसिफ ५२ रनमा आउट भए । त्यसपछि नेपालको इनिङ रोहितले सम्हाल्लेका थिए । आरिफ शेख ३५, विनोद भण्डारी ३, भीम सार्की २ र पवन सरार्फ ३ रनमा आउट भए ।

तल्लोक्रममा करण केसीले आक्रामक ५३ रनको अविजित इनिङ खेले । कमलसिंह ऐरी ४५ रनमा अविजित रहे । आठौं विकेटका लागि करण र कमलले उत्कृष्ट अविजित ब्याटिङ गरेका थिए ।