एजेन्सी – यूईएफए च्याम्पियन्स लिगको अन्तिम क्वाटरफाइनलमा म्यानचेस्टर सिटी र लियोन केहीबेरमा भिड्दैछन् । खेलका लागि दुवै टोलीको सुरुवाती ११ यसप्रकार छ ।

म्यानचेस्टर सिटीले पछिल्लो खेलबाट एक खेलाडी परिवर्तन गरेको छ । मिडफिल्डर फिल फोडेन टोलीबाहिर रहेका छन् भने डिफेन्डर एरिक गार्सिया पहिलो रोजाइमा आएका छन् । रियल म्याड्रिडविरुद्ध डिफेन्समा खेलेका कप्तान फर्नान्डीन्होले मिडफिल्डमा स्थान बनाएका छन् । आक्रमणमा ग्याब्रीएल जेसस र रहिम स्टर्लिङले नै खेल्नेछन् ।

मिडफिल्डमा फर्नान्डीन्होसँगै रोड्रीगो र इल्काए गुन्डोगन रहेका छन् । आक्रामक मिडफिल्डर केभिन डे ब्रुएनले समन्वयकारी भूमिका निर्वाह गर्नेछन् । डिफेन्समा गार्सियासँग एमेरिक लापोर्ट मध्यभागमा छन् । साइड डिफेन्समा काइल वाल्कर र जोआओ कान्सेलो रहेका छन् । गोलरक्षकमा एडरसन मोराएसले निरन्तरता पाएका छन् ।

यता लियोनले युभेन्टसविरुद्ध दोस्रो लेगमा खेलेको टोलीलाई नै उतारेको छ । कप्तान मेम्फिस डिपाएलाई कार्ल तोको एकाम्बीले आक्रमणमा साथ दिनेछन् । चोटका कारण खेल्ने शंका रहेका मिडफिल्डर हौसेम औआरले टोलीमा स्थान बाएका छन् । उनीसँग काकेरेट र ब्रुन्नो गुइमारेसले खेल्नेछन् । दुबोइस र कोर्नेटले विंगब्याकको भूमिका निर्वाह गर्नेछन् ।

डिफेन्डर जेसन डिनाएर अघिल्लो खेलमा चोटका कारण चाडै निक्लेपनि यस खेलका लागि फिट भएका छन् । उनीसँगै मार्सेलो र मार्कालले डिफेन्सको जिम्मेवारी सम्हाल्नेछन् । पोर्चुगिज गोलरक्षक मिगुएल लोपेसले आफ्नो स्थान पक्का राखेका छन् ।

म्यानचेस्टर सिटी : एडरसन – वाल्कर, गार्सिया, लापोर्ट, क्यान्सेलो – फर्नान्डीन्हो, गुन्डोगन, रोड्रीगो – डे ब्रुएना, स्टर्लिङ, जेसस

लियोन : लोपेस – डीनाएर, मार्सेलो, मार्काल – कोर्नेट, औआर, गुइमारेस, ककेरेट, दुबोइस – तोको एकाम्बी, डिपाए