काठमाडौं (हाम्रो खेलकुद) – नेपाली महिला क्रिकेट टोलीले पहिलो टि२० आई खेलमा कतारलाई १ सय १९ रनको फराकिलो अन्तरले पराजित गरेको छ ।

कतारको दोहारमा रहेको वेस्ट इन्ड इन्टरनेशल क्रिकेट स्टेडियममा टस हारेर ब्याटिङको निम्तो पाएको नेपालले निर्धारित २० ओभरमा ४ विकेट गुमाउँदै १ सय ४६ रन बनाएको थियो । नेपालकी इन्दु बर्माले ४७ बलमा ५ चौका सहित सर्वाधिक ५५ रनको योगदान दिइन् । इन्दु रिटायर्ट हर्ट हुँदै अर्को खेलाडीलाई मौका दिएकी थिइन् ।

सीता रानामगर ३३ बलमा ५ चौका सहित ३९ रनमा आउट भइन् । सरिता मगर २१ बलमा २ चौका सहित २१ रनमा रन आउट भइन् । कविता कुँवर ८ रनमा अविजित रहिन् । जितको लागि १ सय ४७ रनको विजयी लक्ष्य पछ्याएको कतार ११.५ ओभरमा २७ रनमा अल आउट भयो । कतारकी खादिजा इम्तियाज र एन्जेलिन मारेले सर्वाधिक ८-८ रन बनाए ।

नेपालको उत्कृष्ट बलिङ सामु घरेलु टोली कतारका ७ खेलाडीले खाता नखोली आउट भएका थिए । नेपालको घातक बलिङ सामु कतारका कुनै पनि ब्याटरले दोहोरो अंकमा रन बनाउन सकेनन् । नेपालकी कप्तान रुविना क्षेत्री बेलबासेले १.५ ओभरमा १ रन खर्चेर ३ विकेट लिइन् । सीता रानामगरले २ ओभरमा १ मेडन सहित ३ रन खर्चेर २ विकेट लिइन् । कविता कुँवरले २ ओभरमा ६ रन खर्चेर २ विकेट लिइन् । करुणा भण्डारीको नाममा १ विकेट रह्यो ।

कतारसँग दोस्रो खेल नेपालले बुधबार खेल्नेछ । पहिलो खेलमा भने नेपालले ब्याटिङ र बलिङ दुबैमा सानदार प्रदर्शन गरेको छ । नेपालले फराकिलो जित निकाल्दा बनेका ४ राष्ट्रिय कीर्तिमान यस प्रकार छन् ।

४. नेपाली महिला टि२० आईको उच्च साझेदारी

नेपाललाई कीर्तिमानी योगफलमा पुर्याउन दोस्रो विकेटका लागि इन्दु वर्मा र सीताले ८८ रनको साझेदारी गरेका थिए । महिला टि२० आई खेलमा नेपालका ब्याटरले गरेको यो उच्च साझेदारी हो । यसअघि इन्दु र सीतालेनै दोस्रो विकेटका लागि इन्डोनेसियाविरुद्ध ७० रनको साझेदारी नेपालको लागि उच्च रहँदै आएको थियो ।

३. नेपाली महिला टि२० आईमा पहिलो अर्धशतक

इन्दु नेपाली महिला टि२० आईमा अर्धशतक प्रहार गर्ने पहिलो खेलाडी बनेकी छिन् । इन्दुले १७ औं ओभरको पहिलो बलमा एक रन लिँदै महिला टि२० आईमा नेपालको लागि अर्धशतक प्रहार गर्ने पहिलो खेलाडीको कीर्तिमान राखेकी थिइन् । उनले ४५ बलमा अर्धशतक पूरा गरेकी थिइन् । यसअघि व्यक्तिगत उच्च प्रदर्शन सीताले सन् २०१९ मा इन्डोनेसियाविरुद्ध ६२ बलमा १ चौका सहित ४८ रन जोडेकी थिइन् ।

२. उच्च योगफल

नेपाली महिला टि२० आई खेलमा कतारविरुद्ध यो उच्च योगफल हो । यसअघि २०१९ मा थाईल्यान्डको बैंककमा भएको आइसिसी महिला टि२० विश्वकप एसिया छनोट अन्तर्गत मलेसियाविरुद्ध नेपालले निर्धारित २० ओभरमा ५ विकेट गुमाउँदै १ सय २६ रन बनाएको थियो ।

१. सर्वाधिक ठूलो जित

१ सय १९ रनको जित नेपाली महिला टि२० आईको रनको हिसाबमा सर्वाधिक ठूलो पर्दछ । यसअघि नेपालको महिला टि२० आईमा सर्वाधिक ठूलो जित २०१९ मा इन्डोनेसियाविरुद्ध ९२ रन थियो ।