एजेन्सी – न्युजिल्यान्डले पहिलो टि२० आई खेलमा भारतलाई १ सय ६५ रनको प्रतिस्पर्धात्मक लक्ष्य दिएको छ । जयपुरमा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ६ विकेट गुमाउँदै १ सय ६४ रन बनायो ।

न्युजिल्यान्डका ओपनर मार्टिन गुप्टिलले ४२ बलमा ३ चौका र ४ छक्का सहित सर्वाधिक ७० रनको योगदान दिए । मार्क च्यापम्यानले ५० बलमा ६ चौका र २ छक्का सहित ६३ रनको योगदान दिए ।

दोस्रो विकेटका लागि मार्टिन गुप्टिल र मार्क च्यापम्यानले ७७ बलमा १ सय ९ रनको शतकीय साझेदारी गरेका थिए । पहिलो ओभरको तेस्रो बलमै भुवनेश्वर कुमारले ओपनर डर्याल मिचेललाई शून्यमा बोल्ड आउट गरेका थिए । त्यसपछि गुप्टिल र च्यापम्यानले उत्कृष्ट शतकीय साझेदारीका साथ प्रतिस्पर्धात्मक योगफलको आधार तय गरेका थिए ।

१४ औं ओभरमा स्पिनर रविचन्द्रन आश्विनले दुई विकेट लिएका थिए । दोस्रो बलमा च्यापम्यानलाई आश्विनले बोल्ड आउट गरेका थिए । पाँचौं बलमा ग्लेन फिलिप्स शून्यमा एलबीडब्लू आउट भएका थिए । तल्लोक्रमका टिम सिफर्ट १२, रचिन रविन्द्र ७ र मिचेल सान्टनरले ४ रन बनाए ।

भारतका स्पिनर रविचन्द्रन आश्विनले ४ ओभरमा २३ रन खर्चेर २ विकेट लिए । भुवनेश्वर कुमारले ४ ओभरमा २४ रन खर्चेर २ विकेट लिए । दीपक चाहर र मोहम्मद शिराजले १-१ विकेट लिए ।