एजेन्सी – अष्ट्रेलियाका टेस्ट कप्तान टिम पेनले कप्तानीबाट राजीनामा दिएका छन् । चार वर्षअघि महिला सहकर्मीलाई अश्निल सन्देशको आरोप लागेपछि पेनले कप्तानी छाडेको जनाएका छन् । विश्व टेस्ट क्रिकेटकै सर्वाधिक प्रतिष्ठित एशेज सिरिज सुरु हुन तीन हप्ता समय बाँकी रहेको अवस्थामा पेनले कप्तानी छाडेका छन् ।

२०१८ मा स्टिभ स्मिथ बल टेम्परिङ काण्डका कारण एक वर्षको प्रतिबन्धमा परेपछि पेनले अष्ट्रेलिया टेस्ट कप्तानी पाएका थिए । स्मिथ प्रतिबन्धमा परेपछि सिमित ओभरको कप्तानी आरोन फिन्चले गरेका थिए । अष्ट्रेलियाले तीव्र गतिका बलर तथा उपकप्तान प्याट कमिन्सलाई कप्तानको जिम्मेवारी दिने सम्भावना छ । स्टिभ स्मिथ पनि कप्तानको रुपमा फर्किने सम्भावना त्यतिनै छ । दीर्घकालिन कप्तानका रुपमा शीर्षक्रमका ब्याटर मार्नस लाबुसेन बन्न सक्छन् । क्रिकेट अष्ट्रेलियाले यस विषयमा भने कुनै प्रतिक्रिया दिएको छैन ।

पेनले २३ खेलमा टेस्ट कप्तानी गर्दा ११ खेलमा जित र ८ खेलमा हार बेहोरेका छन् । चार खेल बराबरीमा सकिएको छ । गत जनवरीमा भारतसँग चार टेस्ट सिरिज घरेलु मैदानमा २–१ ले गुमाएपछि पेनको आलोचना पनि भएको छ । अष्ट्रेलिया र इंग्ल्यान्डबीचको पहिलो टेस्ट खेल डिसेम्बर ८ देखि १२ सम्म दी गाब्बा ब्रिसबेनमा सुरु हुनेछ । यसै साता टि२० विश्वकप जितेको अष्ट्रेलिया मनोबल पनि उच्च छ ।