एजेन्सी – कप्तान रोहित शर्मा र लोकेश राहुलको शतकीय साझेदारीसँगै भारतले न्युजिल्यान्डसँगको तीन टि२० आई खेलको सिरिज एक खेल अगावै २–० ले जितेको छ । दोस्रो खेलमा भारतले न्युजिल्यान्डलाई ७ विकेटले हराउँदै सिरिज जितेको हो ।

जितको लागि १ सय ५४ रनको विजयी लक्ष्य पछ्याएको भारतले १७.२ ओभरमा ३ विकेट गुमाउँदै पूरा गर्यो । भारतको जितमा कप्तान रोहित शर्माले ४९ बलमा ६ चौका र २ छक्का सहित सर्वाधिक ६५ रनको योगदान दिए । अर्का ओपनर लोकेश राहुल ३६ बलमा १ चौका र ५ छक्का सहित ५५ रनमा क्याच आउट भए ।

भारतलाई ओपनर रोहित र राहुलले पहिलो विकेटका लागि १३.२ ओभरमा १ सय १७ रनको उत्कृष्ट शतकीय साझेदारीका साथ सहज जित पक्का गराएका थिए । तीव्र गतिका बलर टिम साउथीले रोहितलाई मार्टिन गुप्टिलबाट क्याच गराउँदै पहिलो सफलता दिलाएका थिए ।
साउथीलेनै लोकेश राहुल र सूर्यकुमार यादवलाई आउट गरेका थिए ।

ऋषभ पन्त ६ बलमा २ छक्का सहित १२ रनमा अविजित रहे । वेंकटेश ऐर ११ बलमा २ चौका सहित १२ रनमा अविजित रहे । न्युजिल्यान्डका कप्तान टिम साउथीले ४ ओभरमा १६ रन खर्चेर ३ विकेट लिए ।

त्यसअघि राँचीमा टस हारेर ब्याटिङको निम्तो पाएको न्युजिल्यान्डले निर्धारित २० ओभरमा ६ विकेट गुमाउँदै १ सय ५३ रन बनाएको थियो। न्युजिल्यान्डका मध्यमक्रमका ब्याटर ग्लेन फिलिप्सले २१ बलमा १ चौका र ३ छक्का सहित सर्वाधिक ३४ रन बनाएका थिए । न्युजिल्यान्डलाई ओपनर मार्टिन गुप्टिल र डर्याल मिचेलले पहिले विकेटका लागि ४।२ ओभरमा ४८ रन जोड्दै राम्रो सुरुवात दिलाएका थिए । तीव्र गतिका बलर दीपक चाहरको बलमा गुप्टिल टप एज लागेर विकेटकिपर ऋषभ पन्तबाट ३१ रनमा क्याच आउट भए । गुप्टिलले १५ बलमा ३ चौका र २ छक्का प्रहार गरे ।

मार्क च्यापम्यान १७ बलमा ३ चौकासहित २१ रनमा लोकेश राहुलबाट क्याच आउट भए । तीव्र गतिका बलर हर्षल पटेलको १२ औं ओभरको दोस्रो बलमा डर्याल मिचेल सूर्यकुमार यादवबाट ३१ रनमा क्याच हुन पुगेका थिए । मिचेलले २८ बलमा ३ चौका प्रहार गरे । विकेटकिपर टिम सिफर्ट १५ बलमा १ चौकासहित १३ रनमा आउट भएका थिए ।

भारतका लागि डेब्यू खेल खेलेका तीव्र गतिका बलर हर्षल पटेलले ४ ओभरमा २५ रन खर्चेर २ विकेट लिए । भुवनेश्वर कुमार, रविचन्द्रन आश्विन, दीपक चाहर र अक्षर पटेलले १–१ विकेट लिए । पहिलो खेलमा भारत ५ विकेटले विजयी भएको थियो । तेस्रो टि२० खेल आइतबार कोलकातामा हुनेछ ।