एजेन्सी – कप्तान दिमुथ करुणरत्नको अविजित शतकीय इनिङमा घरेलु टोली श्रीलंकाले पहिलोे टेस्ट खेलको पहिलो दिन वेस्टइन्डिजविरुद्ध सानदार ब्याटिङ गरेको छ ।

गाले इन्टरनेशल क्रिकेट स्टेडियममा टस जितेर पहिला ब्याटिङ थालेको श्रीलंकाले पहिलो दिनको समाप्तिमा ८८ ओभरमा ३ विकेट गुमाउँदै २ सय ६७ रन बनाएको छ । दिमुथ करुणारत्ने २ सय ६५ बलमा १३ चौका सहित १ सय ३२ रनमा अविजित छन् । दिमुथको यो टेस्ट करिअरको १३ औं शतक हो । धनन्जय डि सिल्भा ७७ बलमा ५ चौका सहित ५६ रनमा अविजित छन् । दिमुथले आफ्नो उच्च लयलाई निरन्तरता दिँदै उत्कृष्ट इनिङ खेलेका छन् । पछिल्ला तीनै टेस्ट खेलमा उनले शतक प्रहार गरेका हुन् ।

पहिलो विकेटका लागि ओपनर पाथुम निसांका र दिमुथ करुणारत्नेले १ सय ३९ रनको शतकीय साझेदारीका साथ श्रीलंकालाई उत्कृष्ट सुरुवात दिलाएका थिए । निसांका तीव्र गतिका बलर शेनन ग्रेबियलको बलमा रेहकम कर्नवालबाट क्याच आउट भएका थिए । निसांकाले १ सय ४० बलमा ७ चौका सहित ५६ रनमा क्याच आउट भए ।

मध्यक्रमका ओशदा फर्नान्डो र एन्जिलो म्याथ्युज ३–३ रनमा आउट भए । चौथो विकेटका लागि धनन्जय डि सिल्भा र दिमुथले ९७ रनको अविजित साझेदारी गर्दै विशाल योगफलको बाटो देखाएका छन् ।