एजेन्सी – पाकिस्तानले बंगलादेशसँगको तीन खेलको टि२० आई सिरिज क्लिनस्वीप गरेको छ । पाकिस्तानले तेस्रो खेलमा घरेलु टोली बंगलादेशमाथि ५ विकेटको रोमान्चक जितका साथ सिरिजमा क्लिनस्विप गर्न सफल भएको हो । जितको लागि १ सय २५ रनको विजयी लक्ष्य पछ्याएको पाकिस्तानले निर्धारित २० ओभरमा ५ विकेट गुमाउँदै पूरा गर्यो ।

पाकिस्तानको जितमा हैदर अलीले ३८ बलमा ३ चौका र २ छक्कासहित सर्वाधिक ४५ रनको योगदान दिए । पाकिस्तानलाई जितको लागि अन्तिम ६ बलमा ८ रन चाहिँएको थियो । कप्तान महमुदूल्लाह रियादले उत्कृष्ट बलिङ गरेपछि खेल अन्तिम बलमा पुगेको थियो । अन्तिम बलमा दुई रन चाहिँएको अवस्थामा मोहम्मद नवाजले ओभर एक्स्ट्रा कभरमा चौकाका साथ खेल जिताएका थिए ।

पहिलो बलमा शरफराज अहमदलाई डट राखेका थिए । दोस्रो बलमा शरफराज र तेस्रो बलमा हैदर अली क्याच आउट हुन पुगे । चौथो बलमा इफितखर अहमदले छक्का प्रहार गरेका थिए । तर पाँचौं बलमा अहमदपनि क्याच आउट भएपछि खेल रोचक बनेको थियो । मोहम्मद रिजवानले ४३ बलमा २ चौका र १ छक्का सहित ४० रन बनाए । बाबर आजम १९, शरफराज अहमद र इफ्तिखर अहमदले ६–६ रन बनाए । बंगलादेशका कप्तान महमुदूल्लाहले १ ओभरमा १० रन खर्चेर सर्वाधिक ३ विकेट लिए । शहिदुल ईस्लाम र अमिनुल ईस्लामले १–१ विकेट लिए ।

त्यसअघि शेरे बंगला नेशल स्टेडियममा टस जितेर पहिला ब्याटिङ थालेको बंगलादेशले निर्धारित २० ओभरमा ७ विकेट गुमाउँदै १ सय २४ रन बनाएको थियो । बंगलादेशका ओपनर मोहम्मद नईमले ५० बलमा २ चौका र २ छक्का सहित सर्वाधिक ४७ रनको योगदान दिए । शमिम हुसैन २२, अफिफ हुसैन २० र महमुदूल्लाह १३ रनमा आउट भए । पाकिस्तानका मोहम्मद वासिम जुनियरले ४ ओभरमा १५ रन खर्चेर २ विकेट लिए । उस्मान कादिरले २, शाहनवाज डाहनी र हरिस रौफले १–१ विकेट लिए ।

पाकिस्तान पहिलो टि२० खेलमा ४ विकेट र दोस्रो टि२० आई खेलमा ८ विकेटले विजयी भएको थियो । पाकिस्तान र बंगलादेशबीच अव दुई टेस्ट खेलको सिरिज हुनेछ । पहिलो टेस्ट खेल नोभेम्बर २६ देखि सुरुहुनेछ ।