काठमाडौं (हाम्रो खेलकुद) – नेपाल पुलिस क्लब बारामा जारी हरपुर क्रिकेट च्याम्पियन ट्रफीको सेमिफाइनलमा पुगेको छ । सोमबार समूह ए को अन्तिम खेलमा पुलिसले प्रदेश नम्बर १ लाई ३२ रनले हराउँदै पुलिसले सेमिफाइनलमा स्थान पक्का गर्यो ।

टस हारेर ब्याटिङ थालेको पुलिसले निर्धारित २० ओभरमा ५ विकेट गुमाउँदै १ सय ५५ रन बनाएको थियो । पुलिसका कुशल भुर्तेलले ३९ बलमा ६ चौका र १ छक्का सहित सर्वाधिक ४७ रनको योगदान दिए ।

अनिल कुमार शाह ३५ बलमा ३ चौका र १ छक्का सहित ३८ रनमा अविजित रहे । दीलिप नाथले १५ बलमा ४ छक्का र २ चौका सहित आक्रामक ३९ रनको इनिङ खेले । सुनिल धमला १४, शंकर राना ३ र अमित श्रेष्ठ २ रनमा आउट भए । प्रदेश १ का मनोज तामाङले ४ ओभरमा ४३ रन खर्चेर ३ विकेट लिए । मुकुन्द यादव र फिर्दोस अन्सारीले १–१ विकेट लिए ।

जितको लागि १ सय ५६ रनको विजयी लक्ष्य पछ्याएको प्रदेश १ ले निर्धारित २० ओभरमा ९ विकेट गुमाउँदै १ सय २३ रन बनायो । प्रदेश १ का श्रवण यादवले ३९ बलमा ३ चौका र ३ छक्का सहित ५१ रनको अविजित इनिङ खेलेपनि टोलीको हार टार्न सकेनन् । कप्तान सिद्धान्त लोहनले २४ बलमा ३ चौका सहित २५ रन बनाए । मुकुन्द यादवले २० रनमा आउट भए । पुलिसका मन्जित श्रेष्ठले ४ ओभरमा २२ रन खर्चेर ३ विकेट लिए । राशिद खान, सागर ढकाल, ललित राजवंशी र कुशल भुर्तेलले १–१ विकेट लिए ।

समूह ए बाट पुलिस र प्रदेश २ सेमिफाइनलमा पुगेका छन् । समूह बी का खेलहरु मंगलबारबाट सुरु हुनेछन् । समूह बी मा त्रिभुवन आर्मी क्लब, नेपाल एपिएफ क्लब, लुम्बिनी प्रदेश र हरपुर क्रिकेट क्लब छन् । सेमिफाइनल मंसिर १० मा हुनेछन् । फाइनल मंसिर ११ मा हुनेछ । विजेताले १ लाख र उपविजेताले ५० हजार प्राप्त गर्नेछन् । मंगलबार आर्मी र हरपुर तथा एपिएफ र लुम्बिनी प्रदेशबीच प्रतिस्पर्धा हुनेछ ।