एजेन्सी – युवा आक्रामक ब्याटर तथा फिनिसर शाहरुख खानको अन्तिम बलमा छक्कासँगै तामिल नाडुले भारतीय लोकप्रिय शैद मुश्ताक अली ट्रफीको उपाधि जितेको छ । तामिल नाडुले फाइनलमा कर्नाटकालाई ४ विकेटले हराउँदै उपाधि जितेको हो ।

जितको लागि १ सय ५२ रनको विजयी लक्ष्य पछ्याएको तामिल नाडुले निर्धारित २० ओभरमा ६ विकेट गुमाउदै पूरा गर्यो । तामिल नाडुलाई उपाधि जित्न अन्तिम बलमा पाँच रन चाहिएको थियो । शाहरुख खानले प्रतिक जैनलाई अन्तिम बलमा छक्का प्रहार गर्दै उपाधि जिताए । तामिल नाडुले अन्तिम ओभरमा १६ रन बनाउँदै उपाधि जितेको हो ।

शाहरुख खान १५ बलमा १ चौका र ३ छक्का सहित ३३ रनमा अविजित रहँदै प्लेयर अफ द म्याच चुनिए । नारायण जगदिशनले ४६ बलमा २ चौका र १ छक्का सहित सर्वाधिक ४१ रन बनाए । कप्तान विजय शंकरले २२ बलमा १८ रन जोडे । कर्नाटका केसी चरिप्पाले सर्वाधिक २ विकेट लिए ।

त्यसअघि अरुण जेन्टली स्टेडियम दिल्लीमा टस हारेर ब्याटिङ थालेको कर्नाटकाले निर्धारित २० ओभरमा ७ विकेट गुमाउँदै १ सय ५१ रन बनाएको थियो । कर्नाटका अभिनव मनोहरले ३७ बलमा ४ चौका र २ छक्का सहित सर्वाधिक ४६ रन बनाए । मनिष पाण्डे १३ र करुण नायर १८ रनमा आउट भए । तामिल नाडुका रविश्रीनिवास साई किशोरले सर्वाधिक ३ विकेट लिए ।

इन्डियन प्रिमियर लिग (आइपिएल) पछि शैद मुस्ताक अली ट्रफी भारतको सर्वाधिक लोकप्रिय टि२० खेल हो । जुन प्रतियोगितालाई टि२० को मान्यता दिएको छ । आइपिएलमा खेलाडी अक्सनमा अनुबन्ध गर्दा शैद मुश्ताक अली ट्रफीको प्रदर्शनलाई विशेष आधार मान्ने गरिन्छ । शाहरुख खानले आइपिएल पन्जाब किंग्सबाट खेल्ने गर्दछन् । अव भारतमा ५० ओभरमो विजय हजारे र प्रथम श्रेणीको रणजी ट्रफी घरेलु प्रतियोगिताको रुपमा हुनेछन् ।