काठमाडौं (हाम्रो खेलकुद) – स्पिनर लव कामतको उत्कृष्ट बलिङमा प्रदेश १ ले यू-१९ राष्ट्रिय क्रिकेट प्रतियोगितामा विजयी सुरुवात गरेको छ । उद्धघाटन खेलमा प्रदेश १ ले बागमतीलाई २६ रनले पराजित गर्दै विजयी सुरुवात गरेको हो ।

जितको लागि १ सय ७६ रनको विजयी लक्ष्य पछ्याएको बागमती ३१.४ ओभरमा १ सय ४९ रनमा अल आउट भयो । बागमतीका विपिन शाहीले ५७ बलमा ३ चौका र २ छक्का सहित सर्वाधिक ४३ रनको योगदान दिए । बायाँ हाते ब्याटर विवेक मगरले ५१ बलमा ८ चौका सहित ४२ रनको योगदान दिए ।

बागमतीले ओपनर सुर्यान्शु कोइरालालाई ५ र उत्तम मगरलाई ४ रनमा गुमाएको थियो । सुर्यान्शु तीन रन लिनेक्रममा रन आउट भएका थिए । तेस्रो विकेटका लागि विपिन र विवेकले ८६ रनको उत्कृष्ट साझेदारी गर्दै खेलमा फर्काएका थिए । स्पिनर लवले २१ औं ओभरको दोस्रो बलम विवेकलाई सुमिरन राईबाट क्याच गराएपछि प्रदेश १ ले उत्कृष्ट पूनरागमन गरेको थियो ।

राम्रो अवस्थामा रहेको बागमतीको मध्यक्रम लवले ध्वस्त बनाएपछि बागमतीले हार्नु परेको हो । स्वपनिल अधिकारी १, प्रतिक श्रेष्ठ १०, प्रतिश जि.सी. ९ र कृश कार्की ४ रनमा आउट भए । प्रदेश १ का लव कामतले ६ ओभरमा २५ रन खर्चेर ५ विकेट लिए । स्पिनर दीपेश कँडेलले ९.४ ओभरमा १ मेडन सहित ४० रन खर्चेर ३ विकेट लिए । दीपक जोशीले १ विकेट लिए ।

त्यसअघि टियु मैदानमा टस जितेर पहिला ब्याटिङ थालेको प्रदेश एक ४५.३ ओभरमा १ सय ७५ रनमा अल आउट भएको थियो । लव कामतले ६९ बलमा ५ चौका सहित ३३ रनमा आउट भएका थिए । तल्लोक्रममा दीपक जोशीले २३ बलमा ३ चौका र २ छक्का सहित तल्लोक्रममा महत्वपूर्ण ३३ रन जोडेका थिए । सोनु अन्सारीले ७३ बलमा ४ चौका सहित ३२ रनमा आउट भए । दीपेश कंडेल २३ रनमा आउट भए ।

बागमतीका कृश कार्कीले १० ओभरमा १ मेडन सहित २३ रन खर्चेर ३ विकेट लिए । स्पिनर तिलक भण्डारीले १० ओभरमा १ मेडन सहित २४ रन खर्चेर ३ विकेट लिए । कप्तान प्रतिश जि.सीले ९ ओभरमा ३५ रन खर्चेर २ विकेट लिए । गौतम केसी र विवेक मगरले १–१ विकेट लिए । बागमतीले दोस्रो खेलमा मुलपानीमा बुधबार गण्डकीसँग खेल्नेछ । प्रदेश १ ले विहीबार कर्णाली प्रदेशसँग मुलपानीमा प्रतिस्पर्धा गर्नेछ । आजको अर्को खेलमा लुम्बिनी प्रदेशले गण्डकी प्रदेशलाई ९ विकेटले हराएको थियो ।