काठमाडौं (हाम्रो खेलकुद) – विभागीय टोली नेपाल एपिएफ क्लब बारामा जारी हरपुर क्रिकेट च्याम्पियन ट्रफीमा लुम्बिनी प्रदेशसँग स्तब्ध भएको छ । मंगलबार भएको खेलमा लुम्बिनी प्रदेशले एपिएफलाई १६ रनले हराउँदै सेमिफाइनल सम्भावना बलियो बनाएको छ ।

टस जितेर पहिला ब्याटिङ थालेको लुम्बिनी १९.५ ओभरमा १ सय १८ रनमा अल आउट भएको थियो । लुम्बिनी प्रदेशका विक्रम भुषालले ३३ बलमा ४ छक्का सहित सर्वाधिक ३९ रनको योगदान दिए । कप्तान कृष्ण कार्कीले २७ बलमा १ चौका र २ छक्का सहित २८ रनको योगदान दिए । सन्दीप रजाली १४ र सौरभ खनाल ४ रनमा आउट भए । सुरुवात कमजोर रहेपनि लुम्बिनी प्रदेशका तल्लोक्रमका ब्याटरले प्रतिस्पर्धात्मक योगफल तयार पारेका थिए । तुल बहादुर थापाले १३ बलमा ४ चौका सहित २० रनको योगदान दिए ।

एपिएफका तीव्र गतिका बलर किशोर महतोले ३.५ ओभरमा ९ रन खर्चेर ४ विकेट लिएका थिए । विपिन कार्की, कप्तान भुवन कार्की, अमरसिंह राउटेलाले १–१ विकेट लिए । जितको लागि १ सय १९ रनको विजयी लक्ष्य पछ्याएको एपिएफ १९ ओभरमा १ सय २ रनमा अल आउट भयो । एपिएफका पुरन विकले ३१ बलमा १ चौका सहित सर्वाधिक २५ रनमा अविजित रहे । ओपनर आसिफ शेख १, रित गौतम ८, आयुशमान बम १८, सुमित महर्जन ७, प्रज्वल शाही १४ र किशोर महतोले ५ रन बनाए ।

लुम्बिनी प्रदेशका स्पिनर दीपेन्द्र राउतले ४ ओभरमा १९ रन खर्चेर ४ विकेट लिए । कृष्ण कार्कीले ४ ओभरमा १७ रन खर्चेर ३ विकेट लिए । अमित तामाङले १ र तुल बहादुर थापाले २ विकेट लिए । आजको पहिलो खेलमा आर्मीले हरपुर क्रिकेट क्लबलाई ५२ रनले हराएको थियो । समूह ए बाट नेपाल पुलिस क्लब र प्रदेश २ सेमिफाइनलमा पुगेका छन् । बुधबार लुम्बिनी र हरपुरबीच प्रतिस्पर्धा हुनेछ । दोस्रो खेलमा आर्मी र एपिएफ भिड्नेछन् ।