काठमाडौं (हाम्रो खेलकुद) – मध्यक्रमका ब्याटर सुवास ऐरको उत्कृष्ट ब्याटिङमा कर्णाली प्रदेशले यू-१९ राष्ट्रिय क्रिकेट प्रतियोगितामा लुम्बिनी प्रदेशलाई २ सय ३३ रनको लक्ष्य दिएको छ ।

टियु मैदानमा टस जितेर पहिला ब्याटिङ रोेजेको कर्णालीले निर्धारित ५० ओभरमा ८ विकेट गुमाउँदै २ सय ३२ रन बनायो । कर्णालीका लागि मध्यक्रमका ब्याटर सुवास ऐरले ९० बलमा ९ चौका र ३ छक्कासहित सर्वाधिक ७६ रनको योगदान दिए । कप्तान निश्चल रावलले ९९ बलमा ५ चौका सहित ४४ रन जोडे ।

पहिलो ओभरको अन्तिम बलमा तीव्र गतिका बलर दुर्गेश गुप्ताले ओपनर मनिश थापालाई शून्यमा बोल्ड आउट गरेका थिए । तर कर्णालीलाई बायाँहाते ओपनर विपिन रावलले २६ बलमा ४ चौका र १ छक्कासहित ३२ रन जोड्दै उत्कृष्ट सुरुवात दिलाएका थिए । गुप्तालेनै सातौं ओभरको तेस्रो बलमा विपिनलाई विकेटकिपर प्रज्वल थापाबाट क्याच गराए ।

तेस्रो विकेटका लागि कप्तान निश्चल र सुवासले १ सय २२ रनको उत्कृष्ट शतकीय साझेदारी गरेपछि बलियो योगफलमा पुर्याएका थिए । सुवासलाई स्पिनर वासिर अहमदले ३६ औं ओभरको पहिलो बलमा बोल्ड आउट गरेका थिए । त्यसअघि सुवासले ब्यक्तिगत ५१ रनमा जीवनदान पाएका थिए ।

स्पिनर अभिषेक गौतमको २७ औं ओभरको पहिलो बलमा कप्तान देव खनालले सट कभरमा क्याच ड्रप गरेका थिए । ३९ औं ओभरको अन्तिम बलमा विशाल विक्रम केसीले निश्चवलाई देव खनालबाट क्याच गराए । तल्लोक्रमका प्रकाश जैशीले ३६ बल खेल्दा १ चौकासहित २५ रनमा क्याच आउट भए । राज शाह ८ र दीनेश पुन ५ रनमा आउट भए । सन्दीप शाही १० र युनिस सिंह ९ रनमा अविजित रहे ।

लुम्बिनीका बायाँ हाते तीव्र गतिका बलर दुर्गेश गुप्ताले ९ ओभरमा ४५ रन खर्चेर ४ विकेट लिए । विशाल विक्रम केसीले २, वासिर अहमद र मोहम्मद हुसैनले १-१ विकेट लिए ।