काठमाडौं (हाम्रो खेलकुद) – बागमती प्रदेशले काठमाडौंमा जारी यू-१९ राष्ट्रिय क्रिकेट प्रतियोगितमा गण्डकी प्रदेशलाई ७५ रनले पराजित गरेको छ । माथिल्लो मुलपानीमा सम्पन्न खेलमा बागमतीले पहिलो जित हात पारेको हो । गण्डकीले लगातार दोस्रो हार हो ।

टस जितेर पहिला ब्याटिङ थालेको बागमती ४८.५ ओभरमा २ सय १३ रनमा अल आउट भएको थियो । बागमतीका मध्यक्रमका ब्याटर विवेक राना मगरले १ सय ११ बलमा ११ चौका र ३ छक्का सहित सर्वाधिक ८९ रनको योगदान दिए । सुर्शांशु कोइराला ६, उत्तम थापामागर ९, विपिन शाही १३, फरिद खान ६, कृश कार्की १५ र प्रतिक श्रेष्ठ १७ रनमा आउट भए । कप्तान प्रतिश जि.सीले १३ बलमा २ चौका र २ छक्का सहित २२, गौतम केसी ७, तिलक भण्डारी १ र सक्रियराज कार्कीले १४ रन बनाए ।

गण्डकीका सुदीप अर्यालले ७ ओभरमा १ मेडन सहित ३१ रन खर्चेर ३ विकेट लिए । कमल परियारले ८ ओभरमा ३० रन खर्चेर ३ विकेट लिए । अभिषेक थापाले ९.५ ओभरमा १ मेडन सहित ४३ रन खर्चेर ३ विकेट लिए । जितको लागि २ सय १४ रनको विजयी लक्ष्य पछ्याएको गण्डकी ४३.३ ओभरमा १ सय ३८ रनमा अल आउट भयो । गण्डकीका अर्जुन कुमालले ९४ बलमा ६ चौका र १ छक्का सहित सर्वाधिक ५४ रनको इनिङ खेलेपनि अन्य ब्याटर चल्न नसक्दा गण्डकी पराजित हुन पुग्यो । मिलन क्षेत्री ८, सुवास भण्डारी १३, किरण पौडेल ९, सुजन गौतम १३ र कमल परियारले १० रन बनाए ।

बागमतीका कप्तान प्रतिश जि.सीले ८.३ ओभरमा १ मेडन सहित ३२ रन खर्चेर ३ विकेट लिए । तिलकराज भण्डारीले ७ ओभरमा १ मेडन सहित २२ रन खर्चेर ३ विकेट लिए । बागमती पहिलो खेलमा प्रदेश १ सँग २६ रनले पराजित भएको थियो । गण्डकी लुम्बिनी प्रदेशसँग ९ विकेटले पराजित भएको थियो ।

टियुमा भएको खेलमा भने कर्णाली प्रदेशले लुम्बिनीलाई १ सय ४० रनको फराकिलो अन्तरले पराजित गरेको थियो । बिहीबार टियुमा प्रदेश नम्बर २ र सुदूरपश्चिमबीच प्रतिस्पर्धा हुनेछ । मुलपानीमा प्रदेश १ र कर्णालीबीच प्रतिस्पर्धा हुनेछ ।