काठमाडौं (हाम्रो खेलकुद) – स्पिनर दीपेन्द्र रावतको उत्कृष्ट बलिङमा लुम्बिनी प्रदेशले हरपुर क्रिकेट च्याम्पियन ट्रफीमा लगातार दोस्रो जित हात पारेको छ । बुधबार लुम्बिनीले आयोजक हरपुर क्रिकेट क्लबलाई ७ विकेटले हराउँदै सेमिफाइनल नजिक पुगेको छ ।

टस जितेर पहिला ब्याटिङ थालेको हरपुर १६.३ ओभरमा ५१ रनमा अल आउट भयो । हरपुरका रोज मोहम्मद अन्सारीले सर्वाधिक ११ रन बनाए । अन्य कुनैपनि ब्याटरले दोहोरो अंकमा रन बनाउन सकेनन् । लुम्बिनीका स्पिनर दीपेन्द्र रावतले ४ ओभरमा २ मेडन सहित ४ रन खर्चेर ४ विकेट लिए । तीव्र गतिका बलर अमित तामाङले ३ ओभरमा १२ रन खर्चेर ३ विकेट लिए ।

५२ रनको सामान्य लक्ष्य लुम्बिनीले १३.१ ओभरमा ३ विकेट गुमाउँदै पूरा गर्यो । लुम्बिनीका रोहन केसीले ३० बलमा ३ चौका सहित सर्वाधिक १९ रन बनाए । सौरभ खनाल ५, सुशान्त थापा १०, सन्दीप नेपाली १ र सन्दीप रजालीले ९ रन बनाए । बुधबार पहिलो खेलमा एपिएफले आर्मीलाई १५ रनले हराएको थियो ।

लुम्बिनी २ खेलमा ४ अंकका साथ शीर्षस्थानमा छ । लुम्बिनीले पहिलो खेलमा एपिएफलाई ५२ रनले हराएको थियो । बिहीबार आर्मीसँग खेल्नेछ । लुम्बिनी सामान्य अन्तरले हार्दा पनि सेमिफाइनलमा पुग्ने बलियो सम्भावना छ । विजयी भएमा समूह विजेता बन्नेछ । आर्मी र एपिएफ समान २ खेलमा २–२ अंकका साथ दोस्रो र तेस्रो स्थानमा छन् ।

समूह ए बाट पुलिस र प्रदेश नम्बर २ सेमिफाइनलमा पुगि सकेका छन् । बिहीबार समूह चरणका अन्तिम खेलहरु हुनेछन् । एपिएफले बिहीबारनै हरपुरसँग खेल्नेछ । एपिएफ विजयी भएमा नेट रनरेटमा निर्भर रहनेछ । लुम्बिनीको नेटरनरेट १.३०१६, आर्मीको ०.९२५ र एपिएफको माइनस ०.२२५ छ ।

भुवनको घातक बलिङमा एपिएफले आर्मीलाई हरायो