काठमाडौं (हाम्रो खेलकुद) – सुदूरपश्चिमका मध्यक्रमका ब्याटर अर्जुन साउदले काठमाडौंमा जारी यू१९ राष्ट्रिय क्रिकेट प्रतियोगितामा प्रदेश २ विरुद्ध विष्फोटक शतक प्रहार गरेका छन् । अर्जुनले ७६ बलमा १२ चौका र ४ छक्का सहित शतक बनाउँदै टोलीलाई विशाल योगफल तर्फ अघि बढाएका छन् । उनी जारी प्रतियोगितामा शतक प्रहार गर्ने पहिलो खेलाडी हुन् । उनले तृतराज दाशको ३४ औं ओभरको चौथो बलमा एक रन बटुल्दै शतक पूरा गरेका थिए ।

टियु क्रिकेट मैदानमा टस हारेर पहिला ब्याटिङ थालेको सुदूरपश्चिमले ३४ ओभरमा ४ विकेट गुमाउँदै २ सय ३९ रन बनाएको छ । सुदूरपश्चिमका अर्जुन साउद ७६ बलमा १२ चौका र ४ छक्का सहित १ सय रनमा खेलि रहेका छन् । लोकेश बम ७३ बलमा १३ चौका र १ छक्का सहित ८१ रनको उत्कृष्ट इनिङ खेलेका थिए । चौथो विकेटको लागि लोकेश र अर्जुनले १ सय ४२ रनको उत्कृष्ट विष्फोटक शतकीय साझेदारी गरेपछि सुदूरपश्चिमले विशाल योगफल बनाएको हो ।

कप्तान विवेक यादवले दोस्रो ओभरको पहिलो बलमै ओपनर खडक बहादुर बोहरालाई शून्यमा बोल्ड आउट गरेका थिए । विवेकलेनै चौथो ओभरको दोस्रो बलमा अर्का ओपनर गजेन्द्र बोहरालाई १६ रनमा बोल्ड आउट गरेका थिए । गजेन्द्रले १५ बलमा २ चौका र १ छक्का प्रहार गरे ।
नरेश भट्ट ३३ बलमा ५ चौका सहित ३० रनमा आउट भए ।

नरेश आउट हुँदा सुदूर १३.१ ओभरमा ८२–३ को अवस्थामा पुगेको थियो । चौथो विकेटका अर्जुन र लोकेशले सानदार शतकीय साझेदारी गर्दै ३१.२ ओभरमा २२४–४ को बलियो अवस्थामा पुर्याएका थिए । लोकेश तृत राजदासको बलमा एज लागेर आशिष झाबाट क्याच भएपछि शतकबाट चुकेका थिए ।