काठमाडौं (हाम्रो खेलकुद) – विकेटकिपर अर्जुन साउदको उत्कृष्ट शतकमा सुदूरपश्चिम प्रदेशले काठमाडौंमा जारी यू१९ राष्ट्रिय क्रिकेट प्रतियोगितामा प्रदेश २ लाई २ सय ९१ रनको बलियो लक्ष्य दिएको छ ।

टियु क्रिकेट मैदानमा टस हारेर ब्याटिङको निम्तो पाएको सुदूरपश्चिम ४१.४ ओभरमा २ सय ९० रनमा अल आउट भयो । सुदूरपश्चिमका अर्जुन साउदले ८५ बलमा १४ चौका र ५ छक्का सहित १ सय १६ रनको उत्कृष्ट शतकीय इनिङ खेले । अर्जुनले ७६ बलमा १२ चौका र ४ छक्का प्रहार गर्दै शतक पूरा गरेका थिए । उनी जारी यू१९ राष्ट्रिय प्रतियोगितामा शतक प्रहार गर्ने पहिलो खेलाडी हुन् । अर्जुनले मध्यगतिका बलर तृतराज दासको ३४ औं ओभरको चौथो बलमा एक रन बटुल्दै शतक पूरा गरेका थिए ।

लोकेश बम ७३ बलमा १३ चौका र १ छक्का सहित ८१ रनमा आउट भएका थिए । सुरुवात औसत रहेपनि चौथो विकेटको लागि लोकेश बम र अर्जुनले १ सय ४२ रनको उत्कृष्ट शतकीय साझेदारी गरेपछि सुदूरपश्चिमले विशाल योगफल बनाएको थियो । लोकेश र अर्जुन बाहेक अन्य ब्याटरको प्रदर्शन भने खासै राम्रो हुन सकेन । एक समय ३ सय ५० माथिको सम्भावना बनाएको देखाएको सुदूरपश्मिचले तल्लोक्रममा कमजोर ब्याटिङ गरेको थियो ।

एक समय ३१.२ ओभरमा २२४–४ को अवस्थामा रहेको सुदूरपश्चिम ४१.४ ओभरमा २ सय ९० रनमा समेटिएको थियो । कप्तान विवेक यादवले दोस्रो ओभरको पहिलो बलमै ओपनर खडक बहादुर बोहरालाई शून्यमा बोल्ड आउट गरेका थिए । विवेकलेनै चौथो ओभरको दोस्रो बलमा अर्का ओपनर गजेन्द्र बोहरालाई १६ रनमा बोल्ड आउट गरेका थिए । गजेन्द्रले १५ बलमा २ चौका र १ छक्का प्रहार गरे ।

नरेश भट्ट ३३ बलमा ५ चौका सहित ३० रनमा आउट भए । नरेश आउट हुँदा सुदूर १३.१ ओभरमा ८२–३ को अवस्थामा पुगेको थियो । चौथो विकेटका अर्जुन र लोकेशले सानदार शतकीय साझेदारी गर्दै ३१.२ ओभरमा २२४–४ को बलियो अवस्थामा पुर्याएका थिए । लोकेश तृत राजदासको बलमा एज लागेर आशिष झाबाट क्याच भएपछि शतकबाट चुकेका थिए । अर्जुन स्पिनर अजय यादवको बलमा ठूलो सट खेल्नेक्रममा लङअफमा आदिल अन्सारीबाट क्याच आउट हुन पुगेका थिए ।

तल्लोक्रमका वसन्त कार्की २७, नारायण जोशी २, शेर मल्ल १ र आकाश चन्द ७ रनमा आउट भए । प्रदेश २ का प्रदीप वासवानले ४.४ ओभरमा १ मेडन सहित ३१ रन खर्चेर ३ विकेट लिए । विवेक यादव र अजय यादवले २–२ विकेट लिए । आदिल अन्सारी र तृतराज दासले १–१ विकेट लिए ।