काठमाडौं (हाम्रो खेलकुद) – तल्लोक्रमका ब्याटर आदिल अन्सरीले उत्कृष्ट ब्याटिङ गरेपछि यू-१९ राष्ट्रिय क्रिकेट प्रतियोगितामा प्रदेश २ ले सुदूरपश्चिम प्रदेशमाथि २ विकेटको रोमान्चक जित हात पारेको छ ।

जितको लागि २ सय ९१ रनको बलियो विजयी लक्ष्य पछ्याएको प्रदेश २ ले ४९.१ ओभरमा ८ विकेट गुमाउँदै पूरा गर्यो । प्रदेश २ का लागि आदिल अन्सारी ४३ बलमा ७ चौका र ६ छक्का सहित ८७ रनमा अविजित रहे । आठौं नम्बरका आदिलले तल्लोक्रममा विष्फोटक ब्याटिङ गरेपछि प्रदेश २ ले रोमान्चक जित हात पारेको हो । एक समय ३९.३ ओभरमा २१४–८ को अवस्थामा पुगेको प्रदेशलाई आदिल र प्रदीव पासवानले नवौं विकेटका लागि ७८ रनको साझेदारी गर्दै जित पक्का गराए ।

अमित यादवले ७५ बलमा ३ चौका र २ छक्का सहित ४९ रन बनाए । गुलशन झाले ५३ बलमा ४ छक्का र २ चौका सहित ४६ रन बनाए । प्रदेश २ लाई ओपनर रोहन विक र सन्दोश कार्कीले ६.४ ओभरमा ४७ रन जोड्दै राम्रो सुरुवात दिलाएका थिए । स्पिनर शेर मल्लले रोहनलाई २३ रनमा बोल्ड गर्दै सुदूरलाई पहिलो सफलता दिलाएका थिए । रोहनले २३ बलमा ४ चौका प्रहार गरे । तृतराज दास नवौं ओभरको चौथो बलमा २ रनमा विकेटकिपर अर्जुन साउदबाट स्टम्पिङ आउट भए । अर्को ओभरमा नरेन्द्र साउदले सन्तोषलाई २१ रनमा क्याच गराए । उनले २४ बलमा ४ चौका प्रहार गरे ।

शेर मल्लले १३ औं ओभरको पाँचौं बलमा आशिष झालाई १६ रनमा कटएण्ड बोल्ड आउट गरेपछि प्रदेश २ एक समय ६९–४ को कमजोर अवस्थामा पुगेको थियो । कप्तान विवेक यादवलाई नरेन्द्र साउदले १४ रनमा एलबीडब्लू आउट गरेपछि १९.२ ओभरमा ९२–५ के अवस्थामा पुगेको थियो । छैटौं विकेटका लागि गुलशन झा र अमित यादवले ९३ रनको साझेदारी गर्दै प्रदेश २ लाई जितको आशा कायमै राखेका थिए ।
पार्ट टाइम स्पिनर लोकेश बमले ३६ औं ओभरको पहिलो बलमा गुलशन झालाई शेर मल्लबाट क्याच गराउँदै साझेदारी तोडेका थिए ।

तीव्र गतिका बलर हेमन्त धामीको अर्को ओभरमा अमित एज लागेर नरेश भट्टबाट क्याच भएपछि अर्धशतक बनाउन एक रनले चुकेका थिए ।
स्पिनर शेर मल्लले १० ओभरमा ४० रन खर्चेर ३ विकेट लिए । अर्का स्पिनर नरेन्द्र साउदले १० ओभरमा २ मेडन सहित ५६ रन खर्चेर ३ विकेट लिए । हेमन्त धामी र लोकेश बलमे १–१ विकेट लिए ।

त्यसअघि टियु क्रिकेट मैदानमा टस हारेर ब्याटिङको निम्तो पाएको सुदूरपश्चिम ४१.४ ओभरमा २ सय ९० रनमा अल आउट भएको थियो । सुदूरपश्चिमका अर्जुन साउदले ८५ बलमा १४ चौका र ५ छक्का सहित १ सय १६ रनको उत्कृष्ट शतकीय इनिङ खेले पनि टोलीको हार टार्न सकेनन् । अर्जुनले ७६ बलमा १२ चौका र ४ छक्का प्रहार गर्दै शतक पूरा गरेका थिए । उनी जारी यू१९ राष्ट्रिय प्रतियोगितामा शतक प्रहार गर्ने पहिलो खेलाडी हुन् । अर्जुनले मध्यगतिका बलर तृतराज दासको ३४ औं ओभरको चौथो बलमा एक रन बटुल्दै शतक पूरा गरेका थिए ।

लोकेश बम ७३ बलमा १३ चौका र १ छक्का सहित ८१ रनमा आउट भएका थिए । सुरुवात औसत रहेपनि चौथो विकेटको लागि लोकेश बम र अर्जुनले १ सय ४२ रनको उत्कृष्ट शतकीय साझेदारी गरेपछि सुदूरपश्चिमले विशाल योगफल बनाएको थियो । लोकेश र अर्जुन बाहेक अन्य ब्याटरको प्रदर्शन भने खासै राम्रो हुन सकेन । एक समय ३ सय ५० माथिको सम्भावना बनाएको देखाएको सुदूरपश्मिचले तल्लोक्रममा कमजोर ब्याटिङ गरेको थियो ।

एक समय ३१।२ ओभरमा २२४–४ को अवस्थामा रहेको सुदूरपश्चिम ४१.४ ओभरमा २ सय ९० रनमा समेटिएको थियो । कप्तान विवेक यादवले दोस्रो ओभरको पहिलो बलमै ओपनर खडक बहादुर बोहरालाई शून्यमा बोल्ड आउट गरेका थिए । विवेकलेनै चौथो ओभरको दोस्रो बलमा अर्का ओपनर गजेन्द्र बोहरालाई १६ रनमा बोल्ड आउट गरेका थिए । गजेन्द्रले १५ बलमा २ चौका र १ छक्का प्रहार गरे ।

नरेश भट्ट ३३ बलमा ५ चौका सहित ३० रनमा आउट भए । नरेश आउट हुँदा सुदूर १३।१ ओभरमा ८२–३ को अवस्थामा पुगेको थियो । चौथो विकेटका अर्जुन र लोकेशले सानदार शतकीय साझेदारी गर्दै ३१.२ ओभरमा २२४–४ को बलियो अवस्थामा पुर्याएका थिए । लोकेश तृत राजदासको बलमा एज लागेर आशिष झाबाट क्याच भएपछि शतकबाट चुकेका थिए । अर्जुन स्पिनर अजय यादवको बलमा ठूलो सट खेल्नेक्रममा लङअफमा आदिल अन्सारीबाट क्याच आउट हुन पुगेका थिए ।

तल्लोक्रमका वसन्त कार्की २७, नारायण जोशी २, शेर मल्ल १ र आकाश चन्द ७ रनमा आउट भए । प्रदेश २ का प्रदीप वासवानले ४.४ ओभरमा १ मेडन सहित ३१ रन खर्चेर ३ विकेट लिए । विवेक यादव र अजय यादवले २–२ विकेट लिए । आदिल अन्सारी र तृतराज दासले १–१ विकेट लिए । शुक्रबार टियु मैदानमा प्रदेश २ र प्रदेश १ बीच प्रतिस्पर्धा हुनेछ । मुलपानीमा लुम्बिनी र सुदूरपश्चिमबीच प्रतिस्पर्धा हुनेछ ।