काठमाडौं (हाम्रो खेलकुद) – युएईमा जारी आइसिसी वुमन्स टि२० विश्वकप एसिया क्षेत्र छनोटमा नेपालले आफ्नो चौथो खेलमा आज मलेसियासँग खेल्दैछ । खेल नेपाली समय अनुसार मध्याहन्न ११ : १५ मा दुबईमा सुरुहुनेछ । ६ टोलीबीच सिंगल राउन्ड रोबिनको आधारमा चलेको यस प्रतियोगिता विजेताले आगमी वर्ष हुने टि२० ग्लोबल छनोट खेल्न पाउनेछ ।

शीर्ष स्थानमा रहेर ग्लोबल छनोट पुग्न नेपाललाई बाँकी दुबै खेलमा फराकिलो जितको आवश्यक देखिन्छ । पहिलो खेलमा हङहङसँग ६ विकेटले स्तब्ध भएको नेपालले भुटानलाई ८ विकेट र कुवेतलाई ९ विकेटले पराजित गर्दै दोस्रो स्थानमा छ । नेपाल ३ खेलमा २ मा जित र १ मा हार सहित ४ अंकका साथ दोस्रो स्थानमा छ । घरेलु टोली युएई ३ खेलमा ३ मानै जितका साथ ६ अंकका साथ शीर्षस्थानमा छ । युएईको नेटरनरेट १.४६७ र नेपालको २.७९७ छ ।

नेपालले अन्तिम खेलमा आइतबार युएईसँग खेल्नेछ । नेपालले उक्त खेलमा युएईलाई हराएको खण्डमा शीर्षस्थानमा रहँदै ग्लोबल छनोटमा पुग्ने सम्भावना छ । तर नेटरनरेटमा निर्भर रहनेछ । युएईले आज कुवेतसँग खेल्दैछ । युएईले मलेसियालाई ३० रन, हङकङलाई ११ रन र भुटानलाई ४७ रनले हराएको थियो ।

मलेसिया पहिलो खेलमा युईसँग पराजित हुँदा दोस्रो खेलमा कुवेतलाई ८१ रनले हराएको थियो । हङकङसँग ४ विकेटले पराजित भएपछि अघिल्लो चरणको सम्भावनाल लगभग सकिएको छ । मलेसिया ३ खेलमा २ मा हार र १ मा जित सहित २ अंकका साथ चौथो स्थानमा छ ।
नेपालले पछिल्ला दुबै खेलमा सहज जित हात पारेको छ ।

त्यस्तै नतिजा आजको खेलमा दोहोराउन चाहन्छ । कुवेतलाई ९ विकेटले हराउन नेपालले २७ रनमै अल अल आउट गरेको थियो । नेपालको सीता रानामगर राम्रो लयमा छिन् । कुवेतविरुद्ध स्पिनर करुणा भण्डारी र संगिता राईले उच्च प्रदर्शन गरेका थिए । ब्याटर इन्दु बर्मा पनि राम्रो लयमा छिन् ।

कमजोर मलेसिया नेपाललाई सरप्राइज दिने सोचमा छ । मलेसिया मध्यक्रमकी ब्याटर मास एलिसा राम्रो लयमा छिन् । उनले हङकङसँग ३८ र कुवेतविरुद्ध ४३ रनको अविजित इनिङ खेलेकी थिइन् । विकेटकिपर वान जुलिया पनि राम्रो ब्याटिङको लागि चिनिन्छिन् । अलराउन्डर विनिफ्रेड दुइईसिंगा मलेसिया प्रमुख हतियार हुन् । नेपाल र मलेसियाबीच दुई महिला टि२० आई खेल भएका छन् । नेपाल दुबै खेलमा विजयी भएको छ ।

नेपाली महिला टोलीः

रुबिना क्षेत्री बेलबासे (कप्तान), सीता रानामगर, डली भट्ट, करुणा भण्डारी, इन्दु बर्मा, सरिता मगर, ज्याति पाण्डे, सरस्वती चौधरी, काजल श्रेष्ठ, सबनम राई, कविता कुँवर, अप्सरी बेगम, कविता जोशी, रोमा थापा र संगिता राई ।