काठमाडौं (हाम्रो खेलकुद) – आइसिसी टि२० विश्वकप एसिया क्षेत्र छनोटमा घरेलु टोली युएईले कुवेतमाथि सानदार जित निकाल्दै नेपाललाई दबाब थपेको छ । कुवेतले प्रस्तुत गरेको ७७ रनको लक्ष्य युएईले ६ ओभरमा ३ विकेट गुमाउँदै पूरा गर्यो । उक्त सानदार जितले युएईले नेटरनरेटमा नेपाललाई पछि पारेको छ । युएई ४ खेलमा ८ अंकका साथ शीर्षस्थानमा छ ।

नेपाल ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । आइतर नेपाल र युएईबीच अन्तिम खेल हुनेछ । शीर्षस्थानमा रहेर अर्को वर्ष हुने टि२० ग्लोबल छनोटमा पुग्न नेपालले युएईलाई हराउनै पर्नेहुन्छ । तर नेपालले नेटरनरेटमा पनि ध्यान दिनुपर्ने हुन्छ । साँघुरो जितले मात्र नेपाल ग्लोबल छनोटमा भने पुग्ने छैन । नेपालको नेटरनरेट २.०८८ र युएईको २.३९८ छ ।

कुवेतसँग खेल्नुअघि युएईको नेटरनरेट १।४६७ थियो । सानदार जितकासाथ नेटरनरेट सुधार गरेको हो । कुवेतसँग युएई सामान्य अन्तरले विजयी भएको भए नेटरनरेटमा नेपाल भन्दा पछि पर्दथ्यो । नेटरनरेटको ठूलो अन्तर नहुँदा धेरै दबाब भने हुने छैन । तर अन्तिम ओभर वा सामान्य अन्तरले भने जितका बाबजुद पनि युएई भन्दा पछि पर्नसक्छ । केहि मनोबल रुपमा दबाब पर्नसक्छ ।

अन्तिम खेलमा नेपाल उत्कृष्ट जितका साथ ग्लोबल छनोटमा पुग्ने सोचमा हुनेछ । युएई नेपालमाथि जित वा साँधुरो हारका साथ ग्लोबल छनोटमा पुग्न चाहन्छ । नेपाल पहिलो खेलमा हङकङसँग ६ विकेटले पराजित भएपनि केहि दबाबमा परेको हो । नेपालले भुटानलाई ८ विकेट, कुवेतलाई ९ विकेट र मलेसियालाई ६ विकेटले हराएको थियो । युएईले हङकङलाई ११ रन, भुटानलाई ४७ रन र मलेसियालाई ३० रनले हराएको थियो ।