काठमाडौं (हाम्रो खेलकुद) – गण्डकी प्रदेशले काठमाडौंमा जारी यू१९ राष्ट्रिय क्रिकेट प्रतियोगितामा पहिलो जित हात पारेको छ । गण्डकीले कर्णाली प्रदेशलाई ३ विकेटले पराजित गर्दै पहिलो जित हात पारेको छ ।

टियु मैदानमा टस हारेर ब्याटिङको निम्तो पाएको कर्णाली २८ ओभरमा १ सय १३ रनमा अल आउट भयो । कर्णालीका प्रकाश जैशीले ३५ बलमा ३ चौका सहित सर्वाधिक २६ रन बनाए । तल्लोक्रमका अनुज चनाराले २२ बलमा २ चौका र १ छक्कासहित २२ रन बनाए । विपिन रावल शून्य, मनिश थापा ११ र रुपक ढकालले २० रनमा आउट भए । गण्डकीका कमल परियारले सर्वाधिक ४ विकेट लिए । किरण पौडेल ३, सुवास भण्डारी र सुदीप अर्यालले १–१ विकेट लिए ।

जवाफी ब्याटिङ थालेको गण्डकीले २६.५ ओभरमा ७ विकेट गुमाउँदै पूरा गर्यो । गण्डकीका दीपक डुम्रेले ५० बलमा ६ चौकासहित सर्वाधिक ३४ रनको योगदान दिए । अर्जुन कुमाल १४, मिलन क्षेत्री ४, उत्सव श्रेष्ठ २६ र सुजन गौतम १३ रनमा आउट भए । कर्णालीका निश्चल रावल र सन्दीप शाहीले २२ विकेट लिए । अनुज चनारा, दीपेश पुन र रुपक ढकालले १–१ विकेट लिए ।

गण्डकी पहिलो खेलमा लुम्बिनीसँग ९ विकेट र दोस्रो खेलमा बागमतीसँग ७५ रनले पराजित भएको थियो । कर्णालीले पहिलो खेलमा लुम्बिनीलाई १ सय ४० रनले हराउँदा प्रदेश १ सँग ७६ रनले पराजित भएको थियो । कर्णालीले सुदूरपश्चिमसँग आइतबार मुलपानीमा खेल्नेछ । गण्डकीले सोमबार प्रदेश २ सँग खेल्नेछ ।