एजेन्सी – भारत र न्युजिल्यान्डबीचको पहिलो टेस्ट खेल रोमान्चक बराबरी भएको छ । एक समय हारको मुखमा पुगेको न्युजिल्यान्डलाई अन्तिम विकेटका लागि अजाज पटेल र रचिन रविन्द्रले सम्हाल्लिएर प्रदर्शन गर्दै बराबरीमा सकाएका थिए ।

जितको लागि २ सय ८४ रनको विजयी लक्ष्य पछ्याएको न्युजिल्यान्डले ९८ ओभरमा १६५–९ को अवस्थामा खेल सकिएको थियो । खेल सकिन अन्तिम दिन ८.४ ओभर बाँकी हुँदा न्युजिल्यान्ड ८९.२ ओभरमा १५५–९ को अवस्थामा पुगेको थियो । हारको मुखमा पुगेको न्युजिल्यान्डलाई रचिन रविन्द्र र अजाज पटेलले ५२ बलमा १० रन जोड्दै विकेट नगुमाएपछि भारत जितको मुखमा पुगेर पनि बराबरीमा चित्त बुझाउनु परेको हो ।

न्युजिल्यान्डका ओपनर टम लाथमले १ सय ४६ बलमा ३ चौका सहित सर्वाधिक ५२ रन बनाए । रविन्द्र ९१ बलमा २ चौका सहित १८ रनमा अविजित रहँदै न्युजिल्यान्डको हार टारेका थिए । २३ बल खेलेका पटेलले २ रन जोडे । पाँचौं दिन ४–१ को अवस्थाबाट सुरुवात गरेको न्युजिल्यान्डले पहिलो सेसनमा विकेट नगुमाउँदै भारतलाई दबाबमा राखेको थियो ।

चौथो दिन अन्तिम समयमा ब्याटिङ गर्न आएका स्पिनर विलियम सोमरभिलले १ सय १० बल खेल्दै ५ चौकाका साथ ३६ रन बनाएपछि न्युजिल्यान्ड पहिलो सेसनमा हाबी बनेको थियो । तर दोस्रो र तेस्रो सेसनमा भारतले निरन्तर विकेट लिएको थियो । रस टेलरलाई रविन्द्र जडेजाले २ रनमा एलबीडब्लू आउट गरे । हेनरी निकोलस एक रनमै अक्षर पटेलको बलमा एलबीडब्लू आउट भएपछि भारत खेलमा हाबी बनेको थियो ।

न्युजिल्यान्डका प्रमुख ब्याटर केन विलियम्सनलाई जडेजाले २४ रनमा एलबीडब्लू आउट गरेपछि समस्यामा परेको थियो । भारतका रविन्द्र जडेजाले सर्वाधिक ४ विकेट लिए । रविचन्द्रन आश्विनले ३, अक्षर पटेल र उमेश यादवले १–१ विकेट लिए ।

दोस्रो इनिङमा भारत ८१ ओभरमा २३४–७ को अवस्थामा इनिङ समाप्तिको घोषणा गरेको थियो । पहिलो इनिङमा ४९ रनको अग्रता लिएको भारतले समग्रमा २ सय ८३ रनको अग्रता लिएको थियो । भारतका श्रेयस ऐरले १ सय २५ बलमा ८ चौका र १ छक्का सहित सर्वाधिक ६५ रन जोडे ।

विकेटकिपर ऋद्धिमान शाह १ सय २६ बलमा ४ चौका र १ छक्का सहित ६१ रनमा अविजित रहे । अक्षर पटेल २८ रनमा अविजित रहे । दोस्रो इनिङमा भारतको सुरुवात भने खराब थियो । एक समय ५१-५ को अवस्थामा पुगेको भारतलाई तल्लोक्रमका ब्याटरले सम्हाल्लेका थिए । मयंक अग्रवाल १७, सुभमन गिल १, चेतेश्वर पुजारा २२ र अजिक्या रहाणे ४ रनमा आउट भए । रविचन्द्रन आश्विन ६२ बलमा ५ चौका सहित ३२ रनमा आउट भए ।

न्युजिल्यान्डका टिम साउथी र काइल जेमिसनले ३–३ विकेट लिए । पहिलो इनिङमा न्युजिल्यान्ड १४२।३ ओभरमा २ सय ९६ रनमा अल आउट भयो । न्युजिल्यान्डका ओपनर टम लाथमले २ सय ८२ बलमा १० चौका प्रहार गर्दै सर्वाधिक ९५ रन बनाए । विल योंग २ सय १४ बलमा १५ चौका सहित ८९ रनमा आउट भए । न्युजिल्यान्डलाई ओपनर टम लाथम र विल योंगले ६६.१ ओभरमा १ सय ५१ रनको उत्कृष्ट शतकीय साझेदारीका साथ उत्कृष्ट सुरुवात दिलाएका थिए ।

तर यी दुई ब्याटर बाहेक अन्य चल्न नसक्दा अग्रता लिनबाट चुकेको थियो । कप्तान केन विलियम्सन १८, रस टेलर ११, हेनरी निकोल्स २ र रचिन रविन्द्र १३ रनमा आउट भए । जेमिसनले २३ रन बनाएका थिए । भारतका स्पिनर अक्षर पटेलले सर्वाधिक ५ विकेट लिए । रविचन्द्रन आश्विनले ३ विकेट लिए ।

भारत पहिलो इनिङमा १११.१ ओभरमा ३ सय ४५ रनमा अल आउट भएको थियो। भारतका श्रेयस ऐरले टेस्ट डेब्यूमै १ सय ७१ बलमा १३ चौका र २ छक्का सहित १ सय ५ रनको शतकीय इनिङ्स खेले । रविन्द्र जडेजा १ सय १२ बलमा ६ चौका सहित ५० रनमा बोल्ड आउट गरे ।

तल्लोक्रमका रविचन्द्रन आश्विनले ५६ बलमा ५ चौका सहित ३८ रन जोडेका थिए । कानपुरमा टस जितेर पहिला ब्याटिङ थालेको भारतलाई जडेजा र ऐरले२ सय २६ बलमा १ सय २१ रनको साझेदारी गरे । ओपनर मयंक अग्रवाललाई १३ रनमा गुमाएपनि सुभमन गिल र चेतेश्वर पुजाराले सम्हाल्लेका थिए ।

दोस्रो विकेटका लागि पुजारा र गिलले १ सय ३३ बलमा ६१ रनको साझेदारी गरेका थिए । गिललाई तीव्र गतिका बलर काइल जेमिसनले ५२ रनमा बोल्ड आउट गरे । ९३ बल खेलेका गिलले ५ चौका र १ छक्का प्रहार गरे । टिम साउथीको बलमा क्याच आउट हुनुअघि पुजाराले ८८ बलमा २ चौका सहित २६ रन जोडे ।

जेमिसनले कप्तान अजिंक्या रहाणेलाई ३५ रनमा बोल्ड आउट गरेका थिए । ६३ बलमा रहाणेले ६ चौका प्रहार गरे । न्युजिल्यान्डका टिम साउथीले सर्वाधिक ५ विकेट लिए । काइल जेमिसनले ३ , स्पिनर अजाज पटेलले २ र टिम साउथीले १ विकेट लिए । दोस्रो टेस्ट डिसेम्बर ३ देखि वानखडे स्टेडियम मुम्बईमा सुरुहुनेछ ।