एजेन्सी – रोयल च्यालेन्जर्स बेंगलोरले इन्डियन प्रिमियर लिग (आइपिएल) २०२२ मा टोलीमा विराट कोहली र ग्लेन म्याक्सवेललाई टोलीमा राख्ने भएको छ । मेगा अक्सन अघि टोलीमा दुई स्टार ब्याटरलाई राख्दै अन्यलाई फुकुवा गरेको छ । आइपिएल नियम अनुसार मेगा अक्सन अघि बढीमा चार खेलाडी राख्न पाइन्छ । तर बेंगलोरले दुई खेलाडी मात्र राख्ने जनाएको छ ।

म्याक्सवेललाई गत अक्सनमा बेंगलोरले १४ करोड २५ लाख भारतीय रुपैयामा अनुबन्ध गरेको थियो । कोहलीले एक सिजनको १७ करोड पारिश्रमिक पाउँदै आएका थिए । चार टोली सबै फ्रेन्चाइज टोलीले ४२ करोड भारुमा अनुबन्ध गरेको हुनुपर्छ । तीन खेलाडी अनुबन्ध गरे ३३ करोड, दुई खेलाडी राखे २४ करोड र एक खेलाडी अनुबन्ध गरे १४ करोड भारु खर्चेको हुनुपर्छ ।

म्याक्सवेलले गत सिजनमा १५ खेलमा ६ अर्धशतक सहित ५ सय १३ रन बनाएका थिए । विष्फोटक ब्याटर म्याक्सवेललाई बेंगलोरले टोलीमै राख्ने निर्णय लिएको हो । कोहली भने २००८ देखि निरन्तर बेंगलोरबाट खेल्दै आएका छन् । आइपिएलमा सर्वाधिक रन बनाउने ब्याटरमा पर्दछन् । कोहलीले २ सय ७ खेलमा ५ शतक र ४२ अर्धशतक सहित कुल ६ हजार २ सय ८३ रन बनाएका छन् ।

२०१३ देखि कोहलीले बेंगलोरको कप्तानी गर्दै आएका थिए । २०१६ को उनको कप्तानीमा बेंगलोर फाइनलमा पुगेको थियो । तर पछिल्लो समय अत्याधिक दबाबपछि कोहलीले यसै सिजनदेखि कप्तानी छाडेका छन् । बेंगलोर यस सिजनमा नयाँ कप्तानको साथ अघि बढ्नेछ । स्पिनर युजभेन्द्र चहल, वासिन्टन सुन्दर, ओपनर देवदत्त पाडिक्कल र तीव्र गतिका बलर हर्षल पटेललाई टोलीमा राख्न सक्ने अनुमान गरिएको थियो । बेंगलोर स्टार खेलाडीले भरिदै आएपनि उपाधि जित्न नसकेको फ्रेन्चाइज टोली हो ।

आइपिएलमा यस सिजन देखि १० टोलीबीच प्रतिस्पर्धा हुनेछ । लखनउ र अहमदाबाद यस सिजनमा थपिएका नयाँ फ्रेन्चाइज टोली हुन् । यी दुई फ्रेन्चाइज टोलीले भने तीन खेलाडी मात्र टोलीमा राख्न पाउनेछन् । जसमा दुई मात्र भारतीय खेलाडी राख्न पाइने छ । दिल्लीले पृथ्वी शा, ऋषभ पन्त, एनरिच नोर्किया र अक्षर पटेललाई टोलीमा राखेको थियो ।

चेन्नई सुपर किंग्सले रविन्द्र जडेजा, महेन्द्रसिंह धोनी, ऋतुराज गायकवाड त्यस्तै कोलकता नाइट राइडर्सले आन्द्रे रसेल, बरुण चक्रवर्ती, वेंकटेश ऐर र सुनिल नारायणलाई राखेको छ । सनराइजर्स हैदराबादले केन विलियम्सन, मुम्बई इन्डियन्सले रोहित शर्मा र जस्प्रित बुमरालाई टोलीमा राखेको छ । राजस्थान रोयल्सले सन्जु स्यामसनलाई टोलीमा राखेको छ ।