एजेन्सी – पाँच पटकको च्याम्पियन मुम्बई इन्डियन्सले स्टार अलराउन्डर हार्दिक पान्ड्यालाई इन्डियन प्रिमियर लिग (आइपिएल) २०२२ को मेगा अक्सन अघि फुकुवा गरेको छ । मुम्बईले कप्तान रोहित शर्मा तीव्र गतिका बलर जस्प्रित बुमराह, सूर्यकुमार यादव, काइरन पोलार्डलाई टोलीमा राखेको छ ।

हार्दिक, ईशान किशन टोलीमै रहन सक्ने खेलाडीको रुपमा थिए । राहुल चाहर र क्रुनाल पान्ड्या पनि दाबेदारमा थिए । आइपिएल नियम अनुसार मेगा अक्सन अघि बढीमा चार खेलाडी राख्न पाइन्छ । चार खेलाडीमा बढीमा तीन भारतीय र दुई विदेशी राख्न पाइन्छ ।

हार्दिक विष्फोटक ब्याटरको लागि विश्व प्रसिद्ध ब्याटर हुन् । मध्य गतिमा बलिङ गर्ने गर्दछन् । मुम्बईले २०२० र २०१९ को उपाधि लगातार जित्दा यी दुई अलराउन्डरको भूमिका महत्वपूर्ण थियो । दुबै ब्याटर एकै खेलमा खेललाई मोड्न सक्छन् ।

आइपिएलमा यस सिजन देखि १० टोलीबीच प्रतिस्पर्धा हुनेछ । लखनउ र अहमदाबाद यस सिजनमा थपिएका नयाँ फ्रेन्चाइज टोली हुन् । यी दुई फ्रेन्चाइज टोलीले भने तीन खेलाडी मात्र टोलीमा राख्न पाउनेछन् । दुई भारतीय र एक विदेशी खेलाडी राख्न पाइने छन् । दिल्लीले पृथ्वी शा, ऋषभ पन्त, एनरिच नोर्किया र अक्षर पटेललाई टोलीमा राखेको थियो ।

चेन्नई सुपर किंग्सले रविन्द्र जडेजा, महेन्द्रसिंह धोनी, ऋतुराज गायकवाड त्यस्तै कोलकता नाइट राइडर्सले आन्द्रे रसेल, बरुण चक्रवर्ती, वेंकटेश ऐर र सुनिल नारायणलाई राखेको छ । सनराइजर्स हैदराबादले केन विलियम्सन, बेंगलोरले विराट कोहली र ग्लेन म्याक्सवेललाई टोलीमै राखेको छ । राजस्थान रोयल्सले सन्जु स्यामसनलाई टोलीमा राखेको छ ।