एजेन्सी – चेन्नई सुपर किंग्सले कप्तान महेन्द्र धोनी सहित चार खेलाडीलाई इन्डियन प्रिमियर लिग (आइपिएल) २०२२ को मेगा अक्सनअघि टोलीमा राख्ने भएको छ । मेगा अक्सन अघि एक फ्रेन्चाइज टोलीले बढीमा चार खेलाडी राख्न पाउछन् । चेन्नईले त्यसै अनुसार महेन्द्रसिंह धोनी, ओपनर ऋतुराज गायकवाड, रविन्द्र जडेजा र मोईन अलीलाई टोलीमा राखेको छ । चार खेलाडीमा बढीमा तीन भारतीय खेलाडी राख्न पाइन्छ ।

चेन्नईले सुरेश रैना, फाफ डु प्लेसिस, ड्वेन ब्राभो र इंग्ल्यान्डका स्टार अलराउन्डर साम करनलाई टोलीबाट फुकुवा गरेको छ । चार खेलाडी मात्र राख्न पाउने हुँदा चेन्नईले टोलीबाट फुकुवा गर्नु परेको हो । चेन्नईका सर्वाधिक सफल ब्याटर रैनाले यस सिजनमा नयाँ टोलीको कप्तानी गर्ने भारतीय मिडियामा चर्चा छ । धोनी र रैनालेसँगै क्रिकेट खेल्दै आएका छन् ।

अक्सन मार्फतनै चेन्नईले रैनालाई टोलीमा ल्याउने अपेक्षा गरिएको छ । धोनी छाडेर अन्य टोलीबाट रैनाले आइपिएल खेल्ने सम्भावना कम देखिन्छ । टोली रहेका ऋतुराज गायकवाड चेन्नईका भविष्यका कप्तानको रुपमा हेरिदै आएको छ । चेन्नईलाई उपाधि जिताउन गायकवाडले १६ खेलमा ६ सय ३५ रन बनाउँदै सर्वाधिक रन बनाउने ब्याटर बनेका थिए । गायकवाड क्लासले भरिपूर्ण वर्तमान समयका एक उत्कृष्ट ओपनर हुन् । जडेजा प्रमुख अलराउन्डर हुन् । धोनीको कप्तानीमा चेन्नईले चार उपाधि जितेको छ ।

आइपिएलको सर्वाधिक सफल टोली चेन्नईले यस सिजनपछि कप्तान परिवर्तन गर्ने सम्भावना छ । धोनीले मेगा अक्सनमा राम्रो टिम बनाउँदै अर्को सिजन देखि कप्तानी छाड्ने बुझिएको छ । आइपिएलमा यस सिजन देखि १० टोलीबीच प्रतिस्पर्धा हुनेछ । लखनउ र अहमदाबाद यस सिजनमा थपिएका नयाँ फ्रेन्चाइज टोली हुन् । यी दुई फ्रेन्चाइज टोलीले तीन खेलाडी राख्न पाउनेछन् । दिल्लीले पृथ्वी शा, ऋषभ पन्त, एनरिच नोर्किया र अक्षर पटेललाई टोलीमा राखेको थियो ।

कोलकता नाइट राइडर्सले आन्द्रे रसेल, बरुण चक्रवर्ती, वेंकटेश ऐर र सुनिल नारायणलाई राखेको छ । सनराइजर्स हैदराबादले केन विलियम्सन, मुम्बई इन्डियन्सले रोहित शर्मा र जस्प्रित बुमरालाई टोलीमा राखेको छ । राजस्थान रोयल्सले सन्जु स्यामसन, बेंगलोरले ग्लेन म्याक्सवेल र विराट कोहलीलाई टोलीमा राखेको छ । पन्जाब किंग्सको नाम सार्वजनिक भएको छैन ।

चेन्नईले २०१० मा मुम्बई इन्डियन्सलाई २२ रनले पराजित गर्दै पहिलो पटक च्याम्पियन बनेको थियो । २०११ मा चेन्नईले बेंगलोरलाई ५८ रनले पराजित गर्दै लगातार उपाधि जितेको थियो । २०१८ मा हैदराबादलाई ८ विकेटले पराजित गर्दै चेन्नई तेस्रो पटक च्याम्पियन बनेको थियो । यस सिजनको फाइनलमा कोलकता नाइट राइडर्सलाई २७ रनले पराजित गर्दै चौथो पटक च्याम्पियन बनेको थियो। चेन्नई २००८, २०१२, २०१३, २०१५ र २०१९ मा उपविजेता बनेको थियो । चेन्नई आइपिएल इतिहासमा पहिलो पटक गतवर्ष लिगबाटै बाहिरिएको थियो ।