एजेन्सी – ओपनर अविद अलीको उत्कृष्ट ब्याटिङमा पाकिस्तानले पहिलो टेस्ट खेलमा घरेलु टोली बंगलादेशमाथि ८ विकेटको सानदार जित हात पारेको छ । योसँगै दुई टेस्ट खेलको सिरिजमा पाकिस्तानले १–० को अग्रता लिएको छ ।

जितको लागि २ सय २ रनको विजयी लक्ष्य पछ्याएको पाकिस्तानले अन्तिम दिन ५८.३ ओभरमा २ विकेट गुमाउँदै पूरा गर्यो । पाकिस्तानका ओपनर अविद अली १ सय ४८ बलमा १२ चौका सहित ९१ रनमा आउट भए । अब्दुल्लाह शफिक १ सय २९ बलमा ८ चौका र १ छक्का सहित ७३ रनमा आउट भए । पहिलो विकेटका लागि अली र शफिकले १ सय ५१ रनको उत्कृष्ट शतकीय साझेदारी गरेका थिए । अजहर अली २४ र बाबर आजम १३ रनमा अविजित रहे । बंगलादेशका ताइजुल ईस्लाम र माहेदी हसनले १–१ विकेट लिए ।

दोस्रो इनिङमा बंगलादेश ५६.२ ओभरमा १ सय ५७ रनमा अल आउट भएको थियो । बंगलादेशका लिटन दासले ८९ बलमा ६ चौका सहित ५९ रन बनाए । यासिर अली ३६, सैफ हसन १८, मुश्फिकुर रहिम १६ र नुरुल हसन १५ रनमा आउट भए । पाकिस्तानका तीव्र गतिका बलर शाहिन शाह अफ्रिदीले ५ विकेट लिए । सजिद खान ३ र हसन अली २ विकेट लिए ।

पाकिस्तान पहिलो इनिङमा २ सय ८६ रनमा अल आउट भएको थियो । ओपनर अविद अली २ सय ८२ बलमा १२ चौका र २ छक्का सहित १ सय ३३ रनमा आउट भए । अर्का ओपनर शफिक ५२ रनमा आउट भए । पहिलो विकेटका लागि शफिक र अलीले १ सय ४६ रनको साझेदारी गरेका थिए । बाबर आजम १०, फहिम अशरफ ३८ र हसन अली १२ रनमा आउट भए । बंगलादेशका ताइजुल इस्लामले सर्वाधिक ७ विकेट लिए ।

पहिलो इनिङमा बंगलादेश ३ सय ३० रनमा अल आउट भयो । बंगलादेशका लिटन दासले २ सय ३३ बलमा ११ चौका र १ छक्का सहित १ सय १४ रनको शतकीय इनिङ्स खेले । मुश्फिकुर रहिम २ सय २५ बलमा ११ चौका सहित ९१ र माहेदी हसन ३८ रनमा आउट भए । पाकिस्तानका हसन अलीले ५ विकेट लिए । शाहिन अफ्रिदी र फहिम अशरफले २–२ विकेट लिए । दोस्रो टेस्ट शनिबार देखि सुरुहुनेछ ।