भुपेन्द्र जिसी, काठमाडौं

विकेटकिपर अर्जुन साउद नेपाली क्रिकेटमा देखिएको धेरै समय भएको छैन । गत माघमा प्रधानमन्त्री कप एकदिवसिय क्रिकेट प्रतियोगिता मार्फत घरेलु क्रिकेटमा पाइला टेकेका अर्जुनले छोटो समय र थोरै अवसरमा धेरै आशा र सम्भावना देखाएका छन् । उनको आक्रामक ब्याटिङ र उत्कृष्ट विकेटकिपर कौशलले नेपाली क्रिकेटलाइ नै नयाँ उत्साह थपेको छ ।

काठमाडौंमा सम्पन्न यू–१९ राष्ट्रिय क्रिकेट प्रतियोगितामा अर्जुनसहितको सुदूरपश्चिम प्रदेश फाइनलमा लुम्बिनीसँग १ सय १३ रनले पराजित भयो । समग्रमा अर्जुनले ७ खेलमा ५ इनिङमा २ सय ४१ रन बनाए । उनी अघि लुम्बिनी प्रदेशका ओपनर देव खनाल ७ खेलमा ३ सय ३४ रनको साथ प्रतियोगिताकै उत्कृष्ट ब्याटर चुनिए । अर्जुनले २६ चौका र १० छक्का प्रहार गरे ।

सुदूरपश्चिम प्रदेश २ सँग दुई विकेटले पराजित भएपनि अर्जुन साउदले पाँचौं नम्बरमा ब्याटिङ गर्दै ८५ बलमा १४ चौका र ५ छक्का सहित १ सय १६ रनको यादगार शतकीय इनिङ खेले । तर आदिल अन्सारी नायक बन्दा सुदूरले २ सय ९० रनको योगफल बचाउन सकेन । नेपाली सिनियर टोलीबाट खेलिसकेका गुलशन झा र घरेलु क्रिकेटका स्टार अलराउन्डर विवेक कुमार यादव प्रमुख बलर रहेको प्रदेश २ विरुद्ध आक्रामक शतकीय इनिङ खेले ।

शतकमात्र होईन त्यसपछि विकेटकिपरमा देखाएको कौशल अझ लोभलाग्दो थियो । १ घण्टा ३९ मिनेट ब्याटिङ गर्न मैदानमा बिताएका अर्जुनले त्यसपछि उत्कृष्ट विकेटकिपर भूमिका निर्वाह गरे । १४ औं ओभरको पहिलो बलमा नरेश भट्ट आउट भएपछि क्रिजमा छिरेका अर्जुन ३७ ओभरको पहिलो बलमा आउट भए । स्पिनर अजय यादवको बलमा ठूलो सट खेलेपनि अर्जुन लङअफमा आदिल अन्सारीबाट क्याच भए ।

शतकपछि उनले विकेटकिपरमा देखाएको जोश, जाँगर, डाइभ र शान्त स्वभाव अझ उत्कृष्ट थियो । विकेटकिपरको समयमा बल समात्न उनको लङ डाइभ त्यतिनै उत्कृष्ट छ । दोस्रो खेलमा लुम्बिनीसँग १६ रनमा आउट हुँदा कर्णालीविरुद्ध ब्याटिङ नै गर्नु परेन ।

गण्डकीविरुद्ध अर्जुनले ६८ रन बनाउनुको साथै दुई क्याच लिँदै प्लेयर अफ द म्याच चुनिए । गण्डकीविरुद्ध डगमगाएको सुदूरलाई जिम्मेवारी प्रदर्शन गरेपछि चार बल अगाडि ६ विकेट गुमाउँदै जित पक्का गराए । गण्डकीविरुद्ध अर्जुनले १ घण्टा २० मिनेट ब्याटिङको लागि क्रिजमा बिताएका थिए । प्रदेश १ विरुद्ध अर्जुन ३२ रनमा अविजित रहँदा बागमतीविरुद्ध ब्याटिङ गर्नु परेन ।

अर्जुनले पिएम कपमा बागमतीविरुद्ध ३१ रनको इनिङ खेलेका थिए । फाइनलमा ९ रनमा आउट भएका थिए । टिम उत्कृष्ट भएपनि टिम एकता कमी, टिम प्लानको कमी, कमजोर व्यवस्थापन तथा प्रशिक्षणले प्रदर्शन अपेक्षा अनुसार रहेन ।

पिएम कपमा नेपाली क्रिकेटका सर्वाधिक सफल पूर्व कप्तान पारस खड्का र वर्तमान कप्तान ज्ञानेन्द्र मल्लको सम्मिलित बागमतीविरुद्ध अर्जुनले माघमा सुदूरपश्चिमबाट डेब्यू गर्दै २८ बलमा १ चौका र ३ छक्का सहित धेरैको ध्यान ताने । उनको इनिङ सानो थियो । खराब अवस्थामा उनले देखाएको आत्माविश्वास र आक्रामक खेल विश्वस्तरिय थियो । ३ सय रनको विजयी लक्ष्य पछ्याएको सुदूर १ सय १९ रनमा अल आउट भएको थियो । अर्जुनले ३१ र नारायण जोशीले २९ बलमा ५ छक्का सहित ४४ रनको इनिङ खेल्दै धेरैको ध्यान तानेका थिए ।

अर्जुनको उक्त प्रदर्शनपछि लेगमा बसेका पारस प्रभावित हुँदै नजिक आएर सोधेका थिए, ‘बाबु तिम्रो नाम के हो र कहाँ बस्छौं?’

अर्जुनले परिचय दिएपछि पारसले सुझाव दिए, ‘फोकस एण्ड किप स्टेडी’ अर्थात ध्यान दिएर अघि बढ्नु । पारसको त्यो भनाईले उनलाई थप प्रेरणा र हौसला थप्यो । ‘पारस दाइ नेपालको सबैको आइडल हुनुहुन्छ । नजिक आएर नाम सोध्दा त धेरै राम्रो र खुसी लाग्यो’, अर्जुनले त्यसबेलाको क्षण सुनाए । उक्त प्रतियोगिताको बाँकी खेलमा प्रदर्शन अपेक्षा अनुसार रहेन ।

अर्जुन आत्माविश्वासले भरिपूर्ण देखिन्छन् । टोली जस्तोसुकै अवस्थामा होस् आफ्नो रेन्जको बललाई बाउन्ड्रीमा परिणत गर्छन् । विकेटकिपिङ पनि उत्तिकै राम्रो छ । यू–१९ प्रतियोगिताकै उत्कृष्ट विकेटकिपर मानिएका अर्जुनको डाइभ उत्कृष्ट छ ।

‘एक ब्याटरको लागि शतक विशेष नम्बर हो । मेरो लागी राम्रो अनुभव थियो । मैले पहिला शतक सोचेको थिएन । शतकले म खुसी छु । टोलीको हारले धेरै दुखी बनाएको छ, अर्जुनले शतकपछि भने ।

प्रदेश २ विरुद्ध अन्तिम समयमा विकेटकिपर छाडेर अर्जुन पेभेलिएनमा निराश मुद्रामा थिए । प्रदेश २ का खेलाडीलाई भिन्दै भेटेर बधाई दिँदै खेल भावना देखाए । ‘व्यक्तिगत प्रर्दशन राम्रो थियो । तर क्रिकेट टिमको खेल हो । शतकले आफ्नो लागि खुसी थिए । हारले भने निकै नराम्रो लाग्यो’, अर्जुनले भने ।

‘मेरो क्षेत्रिय छनोटमा रन लागेको थिएन । त्यसैले चिन्तित थिए । तर रन बनाउनेमा म धेरै आत्माविश्वासी थिए । सिनियर खेलाडीले मलाई विश्वास र राम्रो साथ दिए । खेलाडीलाई साथ पनि खराव लयको समयमा चाहिने हो । खेलमा उतारचढाव हुन्छ नै । कहिले शतक त कहिले शून्य’, उनले भने ।

‘मैले शतक सोचेको थिइनँ । नढाँटि भन्दा मैले ९० पुग्दा पनि शतक सोचेको थिइनँ । ९५ रनपछि चौका हानेर ९९ मा पुगें । म त्यो बेला पनि शतकको लागि सोचेर खेलेको भए ब्याटर होईन । प्रदर्शन उपलब्धी भिन्दै हो । टिम सधैं माथि हुन्छ । हामीले लगातार पाँच क्षेत्रिय छनोट खेल खेलेका थियौ । एक दुई दिनको क्याम्पपछि हामी डेढ दिनको यात्राले काठमाडौं आयौं । विश्राम नहुँदा केहि कठिन पनि भयो’, उनले भने ।

को हुन् अर्जुन साउद ?

बुबा रामबहादुर र आमा खकिसरा साउदको जेठो सन्तानको रुपमा २००३ मा मुम्बईमा भएको हो । उनको एक भाइ (राकेश) छन् । अर्जुनको पुर्ख्यौली घर अछाम हो । तर उनले हालसम्म जन्मथलो देखेका र टेकेका छैनन् । कमजोर आर्थिक अवस्थाले बुबा आमा रोजगारीको कारण भारतमै रहँदै आएका छन् । त्यसैले उनको जन्म र वाल्यकाल मुम्बईको क्रिकेट वातावरणमा वित्यो ।

मुम्बईमा बाबा र आमा सुरक्षा गार्डको रुपमा कार्यरत छन् । धेरै नपढेको कारण रोजगार पाउन गाह्रो हुने अर्जुन बताउँछन् । त्यो कमाईले मुम्बईको महँगीमा परिवार चलाउन धौ-धौ पर्छ । आर्थिक अवस्था कमजोर हुँदा बाल्यकालमा धेरै संघर्ष गर्नुपर्यो । संघर्ष र कमाजोर आर्थिक अवस्थाले अर्जुनको क्रिकेट रुचि रोकिएन । सानोमा उनी पलाष्टिकको ब्याट र बल लिएर गार्डेनमा क्रिकेट खेल्न जान्थे । विस्तारै उनलाई क्रिकेटमा लत बस्दै गयो । अघि बढ्दै जाँदा उनले २०१५ मा मुम्बईको चर्चित पुलिस जिमखानमा क्रिकेट खेल्न थाले ।

१० वर्ष हुँदा क्रिकेट खेल्न सुरु गरे । गरिव परिवारमा हुर्केको हुँदा खेल्न भन्दा पनि पढाईमै ध्यान धेरै हुने बताउछन् । ‘पढाईले धेरै राम्रो होला भन्ने धेरैले सोच्छन् । मुम्बईमा बस्न सहज थिएन । धेरै संघर्ष गरे । परिवारको अवस्था कमजोर थियो । त्यहिँ संघर्षले पनि मलाई धेरै राम्रो पाठ सिकायो । पुलिस जिमखानमा यशस्वी जैसवाल, पृथ्वी शासँगै रणजीका चर्चित खेलाडीसँग नेटमा अभ्याससँगै गर्थ्यौं’, उनले भने ।

अर्जुन नेपालमा २०१९ मा आएका हुन् । उनलाई धनगढी प्रिमियर लिग (डिपिएल) का प्रमुख सुवास शाहीले नेपाल बोलाएका हुन् । २०१८ मा धनगढी क्रिकेट एकेडेमी मुम्बई भ्रमणमा थियो । अर्जुनले मुम्बईको पुलिसबाट डिसिएविरुद्ध राम्रो खेल खेलेपछि सुवासले नेपालमा आएर खेल्न सुझाव दिए ।

‘हामीले मुम्बई भ्रमणमा गएका थियौं । अर्जुनले मुम्बई पुलिसबाट खेलेका थिए । त्यसमा उनले राम्रो खेल खेले । पछि बुझ्दै जादा नेपाली रहेछन् । त्यसपछि मैले नेपालमा आएर खेल्न सुझाव दिएको थिएँ’, सुवासले भने ।

त्यसैमा शाहीले थपे, ‘पछि नेपाल आएर घरेलु क्रिकेट पनि राम्रो खेल्यो । उसको ब्याटिङले मलाई प्रभावित पारेको थियो । आक्रामक ब्याटिङ खेल्ने गर्ने । त्यस समयमा त निकै सानो थियो । अर्को कुरा उ निकै मिहिनेती छ । उसको भविष्य धेरै राम्रो छ ।’

सन् २०१९ मा नेपाल आउनुअघि उनी कहिल्यै नेपाल आएका थिएनन् । सुवासले नेपालमा आउन र आफूले सहयोग गर्ने बताएका थिए । त्यसले उनलाई झन राम्रो लाग्यो । उनले धनगढीको चर्चित लिटिल फ्लावर प्रिमियर लिगमा सानदार प्रदर्शन गरे । उनले एकै खेलमा १३ छक्का सहित लिटिल फ्लावरको सर्वाधिक छिटो शतकको कीर्तिमान राख्न सफल भए । क्षेत्रिय छनोट हुँदै माघमा पिएमकप खेले ।

भारतीय क्रिकेट टोलीका कप्तान तथा ओपनर रोहित शर्मा अर्जुन आदर्श खेलाडी हुन् । उनले २०१५ मा रोहितसँग भेटिसकेका छन् । उनको लागि धेरै खुसीको क्षण थियो । भारतीय ब्याटर अजिक्या रहाणेले समय समयमा मनोबल बढाउने बताए । अर्जुनको अबको सोच यू१९ एसिया कप र पिएम कप छ । उनले धेरै आशा राखेका छैनन् । तर आफ्नो उत्कृष्ट प्रर्दशन दिन चाहन्छन् । मिहिनेतमा कुनै कसर बाँकी नराख्ने उनको सोच छ । धनगढीमा अर्जुन सहकर्मी नरेन्द्र साउदसँग बस्दै आएका छन् । उनको परिवार अहिले पनि मुम्बईमै छ ।

सिनियर टोलीमा आउन यू–१९ को प्रदर्शन पर्याप्त छैन । उनलाई राम्रोसँग थाहा छ । उनी यू–१९ एसिया कप खेल्ने प्रारम्भिक नेपाली टोलीमा परिसकेका छन् । एसिया कपमा टेस्ट टोलीविरुद्ध उनको आफैंमा परिक्षा हुनेछ । त्यसपछि उनी पिएमकपमा केन्द्रित हुनेछन् । अर्जुनले जुन शैलीमा खेल पस्केका र विकेटकिपर भूमिका निर्वाह गरेका छन् त्यसले सिनियर टोली टाढा देखिदैन ।

छोटो समयमै उनले नेपाली क्रिकेटमा नयाँ आशा देखाएका छन् । नेपाल पनि राम्रो विकेटकिपरको खोजीमा छ । विकेटकिपर विनोद भण्डारी करिअरको अन्त्यतिर छन् । आसिफ शेख वर्तमान टोलीमा रहेका अर्का विकेटकिपर हुन् । आक्रामक ब्याटिङ नेपाली खेलाडीमा कमै देखिन्छ । टि२० ग्लोबल छनोट नजिकिंदै गर्दा अर्जुनजस्ता खेलाडी पनि टोलीको भविष्यका रुपमा अघि आएका छन् ।

हाललाई अर्जुन नेपाली क्रिकेटका भविष्य मात्र हुन् । उनलाई नेपालले कसरी सदुपयोग गर्छ त्यसले उनको करिअरमा धेरै प्रभाव पार्नेछ । राम्रोसँग तयार पार्न सके एक प्रभावशाली विकेटकिपर बन्नेमा शंका छैन ।