काठमाडौं (हाम्रो खेलकुद) – काठमाडौंमा जारी प्रधानमन्त्री कप टि२० राष्ट्रिय प्रतियोगिता सेमिफाइनल समिकरण पूरा भएको छ । आइतबार सुदूरपश्चिम प्रदेशले प्रदेश नम्बर १ लाई ७ विकेटले हराएसँगै सेमिफाइनल समिकरण पूरा भएको हो ।

समूह ए बाट नेपाल पुलिस क्लब विजेता र त्रिभुवन आर्मी क्लब उप विजेता रुपमा सेमिफाइनलमा पुगेका छन् । समूह बी बाट नेपाल एपिएफ क्लब विजेता र बागमती प्रदेश उपविजेता रुपमा सेमिफाइनलमा पुगेका हुन् । पहिलो सेमिफाइनलमा नेपाल पुलिस क्लब र बागमती प्रदेशबीच प्रतिस्पर्धा हुनेछ । दोस्रो सेमिफाइनलमा आर्मी र एपिएफबीच प्रतिस्पर्धा हुनेछ । दुबै सेमिफाइनल माघ ४ गते हुनेछन् । फाइनल माघ ५ गते हुनेछ ।

समूह ए बाट नेपाल पुलिस क्लब ३ खेलमा ३ मा नै जितका साथ शीर्ष स्थानमा रह्यो । पुलिसले आफ्नो अन्तिम खेल प्रदेश १ सँग सोमबार खेल्नेछ । प्रदेश १ र पुलिसबीचको खेल शनिबार हुने तालिका थियो । तर प्रदेश १ का खेलाडीमा कोरोना संक्रमण देखिएपछि स्थगित भएको थियो । पुलिसले पहिलो खेलले सुदूरलाई दुई रन, आर्मीलाई ४ विकेट र कर्णाली प्रदेशलाई ८९ रनले हराएको थियो ।

त्रिभुवन आर्मी क्लब ४ खेलमा २ मा जित र १ मा हार सहित ५ अंकका साथ दोस्रो स्थानमा रह्यो । आर्मीले कर्णाली प्रदेशलाई ६३ रनले हराएको थियो । पुलिससँग ४ विकेटले हारेको थियो । प्रदेश १ सँग मुलपानीमा भिजेको आउटफिल्डको कारण १–१ अंक बाँडेको थियो । सुदूरपश्चिम प्रदेशलाई ३ विकेटले हराएको थियो ।

समूह बी मा एपिएफ ४ खेलमा अपराजित हुँदै ८ अंकका साथ शीर्ष स्थानमा रह्यो । एपिएफले पहिलो खेलमा प्रदेश २ लाई २४ रन, बागमती प्रदेशलाई ७ विकेट, गण्डकीलाई २ रन र लुम्बिनी प्रदेशलाई ७ विकेटले हराएको थियो । बागमती ४ खेलमा ३ मा जित र १ मा हार सहित ६ अंक जोड्दै दोस्रो स्थानमा रह्यो ।

बागमतीले पहिलो खेलमा लुम्बिनीलाई ४९ रनले हराउँदै एपिएफसँग ७ विकेटले हारेको थियो । प्रदेश २ लाई ५ विकेट र गण्डकी प्रदेशलाई ४० रनले हराउँदै सेमिफाइनलमा स्थान पक्का गर्यो । फाइनल माघ ५ मा हुनेछ ।