मस्कट (हाम्रो खेलकुद) – युवा विष्फोटक ब्याटर लोकेश बमले चार देश सम्मिलित टि२० आई सिरिजमा युनाइटेड अरव इमिरेट्स( युएई) विरुद्ध नेपाली क्रिकेट टोलीको लागि डेब्यू गरेका छन् । अलअमरेतमा केहि समयपछि टस हुँदैछ । टस अघि नेपालले लोकेशलाई डेब्यू दिएको हो ।

लोकेशलाई अनुभवी ब्याटर शरद भेषावकरले डेब्यू क्याप दिएका थिए । लोकेश प्रधानमन्त्री कप टि२० प्रतियोगितामा नेपाल पुलिस क्लबबाट खेल्दै विश्वफोटक ब्याटिङका साथ सिनियर टोलीमा पहिलो पटक परेका थिए । लोकेशले सेमिफाइनलमा आफ्नो पूर्व टोली त्रिभुवन आर्मी क्लबविरुद्ध नेपाली टि२० इतिहासकै सर्वाधिक छिटो १४ बलमै अर्धशतक प्रहार गरेका थिए ।

आर्मीविरुद्ध लोकेशले १८ बलमा २ चौका र ९ छक्कासहित ६६ रनको आक्रामक अविजित इनिङ खेल्दै सिनियर टोलीको ढोका खोलेका थिए ।लोकेशले बागमती प्रदेशविरुद्ध २१ बलमै अर्धशतक प्रहार गर्नेक्रममा रामनरेश गिरीविरुद्ध एकै ओभरमा पाँच चौका र एक छक्कासहित २६ रन जोडेका थिए । फाइनलमा पुलिसविरुद्ध लोकेशले १५ बलमा १ चौका र ३ छक्कासहित २७ रन जोडेका थिए ।

२०१९ को पिपिएलमा विराटनगर टाइनटन्सबाट चितवन राइनोजविरुद्ध ३६ बलमा ५ चौका र ५ छक्काको ६२ रनको इनिङ खेल्दै नेपाली क्रिकेटमा उदाएका ब्याटर हुन् । लोकेश ओपनिङ, मध्यक्रम र तल्लोक्रम जुन सुकै स्थानमा पनि खेल्न सक्छन् ।

नेपाल लगातार दोस्रो जितको सोचमा हुनेछ । युएई पहिलो खेलमा नेपाललाई हराउँदै सुखद सुरुवात गर्न चाहन्छ । नेपालले पहिलो खेलमा ओमानलाई ६ विकेटले पराजित गरेको थियो । घरेलु टोली ओमानमाथिको जितले नेपालको मनोबल उच्च छ । तर यसै साता आइसिसी विश्वकप लिग–२ मा ओमानमाथि दुई सानदार जित हात पारेको युएई त्यतिनै उत्कृष्ट मनोबलका साथ नेपालविरुद्ध मैदान उत्रनेछ । 

नेपाललाई पहिलो खेलमा जिताउन दीपेन्द्रसिंह ऐरीले ७३ रनको अविजित इनिङ खेलेका थिए । दीपेन्द्रको प्रदर्शन युएईविरुद्ध पनि महत्वपूर्ण हुनेछ ।  ओपनर कुशल भुर्तेल आजको खेलमा पनि खेल्ने छैनन् । उनको कम्मर र तिध्राबीचको भाग ९काखी० मा चोटका कारण युएईसँगको खेल पनि गुमाउने नेपालका मुख्य प्रशिक्षक पुबुदु दासानायिकले जनाएका छन् ।

यो पनि :

लोकेशको क्रिकेट यात्रा र वाल्यकाल : आक्रामक लोकेशको दमदार इन्ट्री