एजेन्सी – इन्डियन प्रिमियर लिग (आइपिएल) २०२२ को मेगा अक्सन पहिलो दिन शनिबार नेपाली लेगस्पिनर सन्दीप लामिछानेलाई कुनैपनि टोलीले रुचि नदेखाएपछि अनसोल्ड भएका छन् । दुई दिन चल्ने अक्सन आज दिउँसो १२ बजेदेखि बेंगलोरमा अक्सन सुरु हुनेछ । आज बाँकी ५ सय खेलाडीमा अक्सनमा मूल्य लाग्नेछ ।

पहिलो दिन अन्तिम खेलाडीका रुपमा सन्दीपको नाम आएको थियो । तर न्यूनतम मूल्य ४० लाख भारु अर्थात ६४ लाख नेपाली रुपैयाँ तिर्न कुनैपनि टोली रुचि देखाएनन् । आइतबार सन्दीप अक्सनमा बिक्न सक्ने झिनो आशा भने कायमै रहनेछ । आइतबार सबै सेटको अक्सनपछि कुनैपनि टोलीले अनसोल्ड भएका खेलाडी किन्न सक्छन् ।

आइतबार आफूले चाहेको खेलाडी नपाएमा फ्रेन्चाइज टोलीले अनसोल्ड खेलाडी किन्न सक्नेछन् । त्यो अवस्थामा उक्त खेलाडीले न्यूनम मूल्य पाउनेछ । अव सन्दीपको आशा पनि त्यहिँ झिनो बाँकी छ । अर्थात पहिलो दिन असनोल्ड हुँदैमा उक्त खेलाडीको पूरै सम्भावना सकिने होईन । दोस्रो राउन्डमा पनि बिक्न सक्ने सम्भावना रहन्छ ।

कुनै फ्रेन्चाइज टोलीले कम मूल्यमा लेग स्पिनर चाहिँएमा सन्दीपलाई अन्तिम समयमा विकल्प हुनसक्छन् । २०१९ मा क्रिस गेललाई सुरुमा कुनैपनि टोलीले किनेका थिएनन् । अन्तिममा पन्जाब किंग्सले न्यूनतम मूल्य २ करोडमा राखेको थियो । अन्तिममा खेलाडी बिक्न सक्ने झिनो आशा सन्दीपको पनि रहन्छ ।

दोस्रो दिन अक्सनमा दक्षिण अफ्रिका तरबेज शाम्सी, ईस सोधी, महेश थेक्सना, विक्की ओस्टल, मिचेल सान्टनर, अकिल हुसैन, तनविर संघा, राधाकृष्णन लगायत थुप्रै नाम चलेका र नचलेका स्पिनरमाथि अक्सन हुनेछ । पहिलो दिन ९७ खेलाडीमा मूल्य लागेको थियो । दोस्रो दिन ५ सय ३ खेलाडीमाथि मूल्य लाग्नेछ । अन्तिम समयमा अक्सनमा दुई अष्ट्रेलिया र ८ भारतीय खेलाडी थपिएका थिए । जसमा अष्ट्रेलिया स्पिन अलराउन्डर निवेथान राधाकृष्णनको नाम थपिएको थियो । उनको बल टर्न र ब्याटिङलाई लिएर प्रशंसा भएको हुँदा उनी किन्न सक्नेछन् ।

सन् २०१८ मा तत्कालिन दिल्ली डेयर डेभिल्स (दिल्ली क्यापिटल्स) ले न्यूनतम मूल्य २० लाख भारु अक्सनमा किनेपछि सन्दीप आइपिएल खेल्ने पहिलो नेपाली खेलाडी बनेका थिए । २०२० सम्म दिल्लीमा रहेका सन्दीपले ९ खेल खेल्दै १३ विकेट लिएका थिए । २०२१ मा भने दिल्लीले सन्दीपलाई फुकुवा गरेपछि अक्सनमा गएका सन्दीपलाई कुनैपनि टोलीले किनेका थिएनन् ।

२०१८ मा दिल्लीले लिगबाट बाहिरिएपछि अन्तिम तीन खेलमा मौका दिँदा सन्दीपले ५ विकेट लिएका थिए । २०१९ मा ६ खेलमा सन्दीपले ९ विकेट लिएका थिए । २०२० मा भने पुरै बेन्चमा बसेर फर्किएका थिए । मेगा अक्सनमा सन्दीपले ४० लाख भारु अर्थात ६४ लाख नेपाली रुपैयाँ न्यूनतम मूल्य राखेका थिए । २०२१ को अक्सनमा भने सन्दीप विकेका थिएनन् ।

सुरश रैना, स्टिभ स्मिथ, आदिल राशिद, सकिब अल हसन, मुजिब उर रहमान, उमेश यादव, मोहम्मद नाबी, डेविड मिलर, इमरान ताहिर एडम जाम्पा र अमित मिश्रा जस्ता खेलाडी विकेका छैनन् ।