एजेन्सी – श्रीलंकाले पाँचौं तथा अन्तिम टि२० आई खेलमा घरेलु टोली अष्ट्रेलियालाई ५ विकेटले पराजित गरेको छ । योसँगै पाँच टि२० आई सिरिज घरेलु टोली अष्ट्रेलियाले ४–१ ले जितेको छ ।

१ सय ५५ रनको विजयी लक्ष्य श्रीलंकाले १९.५ ओभरमा ५ विकेटको क्षतिमा पूरा गर्यो । अन्तिम ओभरमा श्रीलंकालाई जितको लागि ९ रन चाहिँएको अवस्थामा तीव्र गतिका बलर केन रिचर्ड्सनलाई कप्तान दासुन शनकाले तेस्रो बलमा छक्का प्रहार गर्दै जित सहज बनाए ।
श्रीलंका विकेटकिपर कुशल मेन्डिस ५८ बलमा ५ चौका र १ छक्कासहित ६९ रनमा अविजित रहँदै जित पक्का गरे ।

कप्तान दासुन शनकाले ३१ बलमा २ छक्कासहित ३६ रन जोडे । चारिथ असलंका २० र पाथुम निसंका १३ रनमा आउट भए । अष्ट्रेलियाका केन रिचर्ड्सनले २ र एस्टन अगरले १ विकेट लिए ।

त्यसअघि मेलबन क्रिकेट ग्राउन्डमा टस जितेर पहिला ब्याटिङ गरेको अष्ट्रेलियाले निर्धारित २० ओभरमा ६ विकेट गुमाउँदै १ सय ५४ रन बनाएको थियो । अष्ट्रेलिया विकेटकिपर म्याथ्यु वेडले २७ बलमा २ चौका र २ छक्कासहित सर्वाधिक ४३ रन बनाए । आरोन फिन्च ८, जोश इंग्लिस २३ र ग्लेन म्यााक्सवेल २१ बलमा २ चौका र १ छक्कासहित २९ रनम आउट भए । मार्कस स्टोइनिस १७ र ड्यानियल साम्स १८ रनमा आउट भए ।

श्रीलंकाका तीव्र गतिका बलर लाहिरु कुमारा र दुश्मन्था चामिराले २–२ विकेट लिए । अष्ट्रेलिया पहिलो खेलमा २० रन, दोस्रो खेलमा सुपर ओभरमा, तेस्रो र चौथो खेलमा ६–६ विकेटले विजयी भएको थियो । सिरिजमा १ सय ३८ रन बनाउनुको साथै १ विकेट लिएका ग्लेन म्याक्सवेल प्रतियोगिता सर्वोत्कृष्ट खेलाडी चुनिए ।

अष्ट्रेलियाले अर्को महिना तीन ओडिआई, तीन टेस्ट र एक टि२० आईको लागि पाकिस्तान भ्रमण गर्नेछ । श्रीलंकाले तीन टि२० आई र दुई टेस्टको लागि भारत भ्रमण गर्नेछ । श्रीलंका र भारतबीचको पहिलो टेस्ट २४ फेब्रुअरीदेखि लखनऊमा सुरुहुनेछ ।