एजेन्सी – मध्यक्रमका ब्याटर सूर्यकुमार यादव र अलराउन्डर वेंकटेश ऐरको उत्कृष्ट प्रदर्शनमा भारतले वेस्टइन्डिजसँगको तीन टि२० आई खेलको सिरिजमा क्लिनस्विप गरेको छ । तेस्रो तथा अन्तिम टि२० आई खेलमा भारतले वेस्टइन्डिजलाई १७ रनले हराउँदै सिरिजमा क्लिनस्विप गरेको हो ।

१ सय ८५ रनको विजयी लक्ष्य पछ्याएको वेस्टइन्डिजले निर्धारित २० ओभरमा ९ विकेट गुमाउँदै १ सय ६७ रन बनायो । वेस्टइन्डिजका विकेटकिपर निकोलस पुरनले ४७ बलमा ८ चौका र १ छक्कासहित सर्वाधिक ६१ रनको योगदान दिए । रोभम्यान पावेल १४ बलमा २ चौका र २ छक्कासहित २५ रनमा आउट भए ।

रोमारियो शेफर्डले २१ बलमा १ चौका र २ छक्कासहित २९ रन बनाए । अन्य खेलाडीले राम्रो प्रदर्शन गर्न सकेनन् । भारतका हर्षल पटेलले ४ ओभरमा २२ रन खर्चेर ३ विकेट लिए । शार्दुल ठाकुर, वेंकटेश ऐर र दीपक चाहरले २–२ विकेट लिए ।

त्यसअघि इडेन गार्डेन कोलकातामा टस हारेर ब्याटिङ थालेको भारतले निर्धारित २० ओभरमा ५ विकेट गुमाउँदै १ सय ८४ रन बनायो ।भारतका सूर्यकुमार यादवले ३१ बलमा १ चौका र ७ छक्कासहित ६५ रनको आक्रामक इनिङ खेले । वेंकटेश ऐरले १९ बलमा ४ चौका र २ छक्कासहित ३५ रनमा अविजित रहे ।

छैटौं विकेटका लागि ऐर र सूर्यले ३७ बलमा ९१ रनको उत्कृष्ट साझेदारी गरेका थिए । ओपनर ऋतुराज गायकवाड ४, श्रेयस ऐर २५ र रोहित शर्मा ७ रनमा आउट भए । ईशान किशन ३१ बलमा ५ चौकासहित ३४ रनमा आउट भए ।

वेस्टइन्डिजका जेसन होल्डर, रोमारियो शेफर्ड, रोश्टन चेश, हेडेन वाल्श जुनियर र डोमेनिक ड्रक्सले १–१ विकेट लिए । भारत पहिलो खेलमा ६ विकेट र दोस्रो खेलमा ८ रनले विजयी भएको थियो ।