एजेन्सी – भारतीय तथा चेन्नई सुपर किंग्सका तीव्र गतिका बलर दीपक चाहरले इन्डियन प्रिमियर लिग (आइपिएल) २०२२ गुमाउने भएका छन् । चाहर ब्याक इन्जुरीको कारण आइपिएल पुरै गुमाउने भएका छन् । चाहर चोटका कारण चेन्नईको टोलीमा भने उपलब्ध थिएनन् ।

चेन्नईले दुई महिना अघि अक्सनमा चाहरलाई १४ करोड भारु (झन्डै २३ करोड नेपाली रुपैयाँ ) खर्चेको थियो । जुन कुनैपनि भारतीय तीव्र गतिका बलरले अक्सनमा पाएको सर्वाधिक मूल्य हो ।

चाहरलाई २०१६ को अक्सनमा राइजिङ पुणे सुपर जायन्टले १० लाख न्यूनतम मूल्यमा किनेको थियो । २०१८ को मेगा अक्सनमा चेन्नईले ८० लाख भारुमा किनेको थियो ।

दीकपकले चेन्नईमा यसअघि ८० लाख मात्र मूल्य पाउँदै आएका थिए । यस सिजनमा फुकुवा गरेपनि उनले २ करोड न्यूनतम मूल्य राखेका थिए । सुरुमा दिल्ली र हैदराबादबीच कडा प्रतिस्पर्धा भएको थियो । तर ११ करोडपछि चेन्नईले पनि रुचि देखाउँदै १४ करोडमा भित्र्याएको थियो ।

दीपकले गत जुलाईमा श्रीलंकासँग दोसो ओडिआई खेल जिताउन ६९ रन बनाउनुको साथै २ विकेट लिएका थिए । अघिल्लो महिना दक्षिण अफ्रिकासँग ५४ र केहि दिनअघि वेस्टइन्डिजसँग ३८ रन बनाएपछि सबै फ्रेन्चाइज टोलीले नजर लगाएका थिए ।

चेन्नईमा तीव्र गतिका बलरमा क्रिस जोर्डन, मुकेश चौधरी, एडम मिल्ने, ड्वेन प्रिटोरियस, ड्वेन ब्राभो जस्ता बलर छन् । चेन्नई ५ खेलमा १ मा जित र ४ मा हार सहित नवौं स्थानमा छ । चेन्नई सुरुवाती चार खेलमा लगातार पराजित भएको थियो । चेन्नई कोलकाता नाइट राइडर्स र लखनऊ सुपर जायन्ट्ससँग ६–६ विकेटले पराजित भएको थियो ।

पन्जाब किंग्ससँग ५४ रन र सनराइजर्स हैदराबादसँग ८ विकेटले पराजित भएको थियो । रोयल च्यालेन्जर्स बेंगलोरलाई २३ रनले हराउँदै पहिलो जित निकालेको थियो । चेन्नईले अव आइतबार गुजरात टाइटन्ससँग खेल्नेछ । महेन्द्र सिंह धोनीले कप्तानी छाडेपछि रविन्द्र जडेजाले यस सिजनमा नेतृत्व सम्हाल्लेका छन् ।