एजेन्सी – अष्ट्रेलियाले पाकिस्तानसँगको पहिलो टेस्ट खेलको पहिलो इनिङमा सानदार ब्याटिङ गरेको छ । तेस्रो दिनको समाप्तिमा अष्ट्रेलिया ७३ ओभरमा२७१–२ को बलियो अवस्थामा छ । अष्ट्रेलिया अझैं पहिलो इनिङमा २ सय ५ रनले पछि परेको छ ।

अष्ट्रेलिया युवा ब्याटर मार्नस लाबुसेन १ सय १७ बलमा ९ चौकासहित ६९ रनमा अविजित छन् । स्टिभ स्मिथ ५५ बलमा ३ चौकासहित २४ रनमा अविजित छन् । तेस्रो विकेटका लागि स्मिथ र लाबुसेनले ६८ रनको साझेदारी गरेका छन् ।

पहिलो विकेटका लागि ओपनर उस्मान खवाजा र डेविड वार्नरले ४०.४ ओभरमा १ सय ५६ रनको उत्कृष्ट शतकीय साझेदारी गरे । वार्नर स्पिनर सजिद खानको बलमा ६८ रनमा बोल्ड आउट भए । वार्नरले १ सय १४ बलमा १२ चौका प्रहार गरे । अर्का ओपनर खवाजा जन्मथलोविरुद्ध शतक बनाउन मात्र तीन रनले चुकेका थिए ।

स्पिनर नौमान अलीको बलमा स्विप सट खेल्नेक्रममा गल्भ्समा लागेर इमाम उल हकबाट ९७ रनमा क्याच आउट भए । उनले १ सय ५९ बलमा १५ चौका प्रहार गरे । पाकिस्तानले रिभ्यु लिँदै खवाजालाई आउट गरेको थियो ।

त्यसअघि घरेलु मैदान रावलपिन्डीमा टस जितेर पहिला ब्याटिङ गरेको पाकिस्तानले पहिलो इनिङमा १ सय ६२ ओभरमा ४७६(४ को अवस्थामा इनिङ समाप्तिको घोषणा गर्यो । पाकिस्तानका अजहर अलीले ३ सय ६१ बलमा १५ चौका र ३ छक्का सहित १ सय ८५ रनको उत्कृष्ट शतकीय इनिङ खेले । उनको यो टेस्ट करिअरको १९ औं शतक हो । मार्नस लाबुसेनको बलमा क्यामरन ग्रिनबाट क्याच भएपछि दोहोरो शतक बनाउन १५ रनले चुकेका थिए ।

ओपनर इमाम उल हकले ३ सय ५८ बलमा १६ चौका र २ छक्कासहित १ सय ५७ रनको उत्कृष्ट शतकीय इनिङ खेले । यो उनको टेस्ट करिअरको पहिलो शतक हो । उनी कप्तान प्याट कमिन्सको बलमा एलबीडब्लू आउट भए ।

दोस्रो विकेटका लागि अजहर अली र इमाम उल हकले २ सय ८ रनको उत्कृष्ट दोहोरो शतकीय साझेदारी गरेका थिए । तेस्रो विकेटका लागि बाबर आजम र अजहरले १ सय १ रनको शतकीय साझेदारी गरेका थिए । बाबर ८२ बलमा ३ चौकासहित ३६ रनमा आउट भए ।

पहिलो विकेटका लागि सफिक र हकले ३४ ओभरमा १ सय ५ रनको उत्कृष्ट शतकीय साझेदारीका साथ सुरुवात दिलाए । सफिक १ सय ५ बलमा ३ चौका र १ छक्कासहित ४४ रनमा आउट भए । मोहम्मद रिजवान २९ र इफ्तिखर अहमद १३ रनमा अविजित रहे ।