काठमाडौं (हाम्रो खेलकुद) – थाइल्यान्डमा जारी एसिसी महिला एसिया कप टि ट्वान्टीमा सहभागी ६ टोली मध्ये नेपालको प्रदर्शन सबैभन्दा कमजोर रहँदै आएको छ । नेपालको बलिङ ठिक ठाककै भएपनि ब्याटिङ सबैभन्दा कमजोर रहँदै आयो ।
कुनै पनि खेलमा नेपाली टोली लामो समय टिक्न सकेन । थाइल्यान्डसँग बनाएको ६३ रननै टोलीले पछिल्ला ४ खेलमा बनाएको सबैभन्दा बढी योगफल हो । अघिल्ला ४ खेलमा निराशाजनक प्रदर्शन गरेको नेपालले अन्तिम खेल शुक्रबार साविक विजेता भारतविरुद्ध खेल्दैछ । भारत त्यो टोली हो जसले अन्तिम खेल अघि नै एसिया कपको फाइनलमा स्थान सुरक्षित गरिसकेको छ । प्रतियोगिताबाट बाहिरी सकेको नेपालले सहभागी मध्ये सबैभन्दा सफल टोलीसँग प्रतिस्पर्धा गर्दा झनै बढी दबाब खेप्नु पर्ने छ ।

पहिलो खेलमा पाकिस्तानसँग ९ विकेटले पराजित नेपाल श्रीलंका ८ विकेटले पराजित भएको थियो । त्यस्तै अन्य दुई खेलमध्ये नेपालले बंगलादेशसँग ९२ रन र बिहीबार थाइल्यान्डसँग ८ विकेटको हार बेहोरेको थियो । टेस्ट खेल्ने चार राष्ट्रविरुद्ध नेपालको प्रदर्शन कमजोर प्रदर्शन रहने अपेक्षित नै थियो । तर बराबर स्तरको मानिएको थाइल्यान्डविरुद्ध पनि ६३ रनमा अलआउट हुनुले नेपाली टोलीको कमजोरी प्रष्ट देखिएको छ । भारतसँग जति लामो समय मैदानमा टिक्न सक्छ, त्यसैले नेपालको यात्रालाई थोरै मात्र भएपनि सुखद बनाउन सक्ला, अन्यथा एसिया कपमा नेपालको यात्रा बिर्सनलायक हुनेछ ।
राउन्ड रोविनपछि शीर्ष दुई टोलीबीच फाइनल हुनेछ । सबै ४ खेल जितेको भारतको ८ अंक छ भने दोस्रो स्थानको पाकिस्तानको ६ अंक । समान ४ अंक भएका श्रीलंका तेस्रो र बंगलादेश चौथो स्थानमा छ । थाइल्यान्डको २ अंक छ भने नेपाल अंक बिहिन छ ।

TEAMS	M	W	L	Pts	NRR
India*	4	4	0	8	+2.16
Pakistan	4	3	1	6	+1.42
Sri Lanka	4	2	2	4	+1.18
Bangladesh	4	2	2	4	+0.31
Thailand	4	1	3	2	-1.74
Nepal	4	0	4	0	-3.17

* India have qualified for Sunday’s final