सुबास हुमागाईं, काठमाडौं

वृत्य अरविन्द भर्खर १९ वर्षका भए । अन्तर्राष्ट्रिय क्रिकेटमा प्रवेश गरेको छोटो समयमा नै उनी विपक्षी टोलीका लागि तगारोको भूमिकामा स्थापित भइसकेका छन् । शीर्षक्रममा निडर ब्याटिङ गर्ने विकेटकिपर वृत्यले नेपालमा त खलनायककै पहिचान बनाएका छन् ।

वृत्यकै उत्कृष्ट प्रदर्शनमा गत महिना ओमानमा भएको टी-२० विश्वकप छनोटसहित नेपाल तीन वटा विश्वकप खेल्नबाट बन्चित भइसकेको छ । उनी आईसीसी विश्व टी-२० छनोटमा यूएईको ब्याटिङ अर्डरमा मुख्य खेलाडी थिए । वृत्यले प्रतियोगिता अवधिभर उत्कृष्ट प्रदर्शन गर्दै सर्वोत्कृष्ट खेलाडीको उपाधि पनि जिते ।

प्रतियोगिता सुरु हुनुअघि वृत्य टोलीमा रहेपनि धेरै रन बनाउन नसक्दा दबाबमा थिए । तर उनलाई आफू र टोलीले गरेको मिहिनेतको प्रतिफल प्राप्त हुनेमा विश्वस्त थिए । ‘हामीले विगत ६ महिनादेखि राम्रो तयारी गरेका थियौं र यो लक्ष्य प्राप्त गर्न कडा मिहिनेत गरेका थियौं । दुई वर्षदेखि टोलीमा भएपनि अहिलेसम्म ठूलो स्कोर नजोडेका कारण दबाबमा थिएँ । मलाई ठूलो स्कोर आवश्यक थियो । १/२ राम्रो इनिङपछि आत्मविश्वास बढ्छ, र मलाई लाग्छ कि त्यस्तै भयो । आयरल्यान्ड विरुद्धको ठूलो स्कोरपछि म अगाडि बढें,’ उनले छनोटको बारेमा भने ।

वृत्यले प्रतियोगिताको दाबेदार मानिएको आयरल्याण्डविरुद्ध ९७*(६७) को उत्कृष्ट इनिङ खेले । त्यसपछि दोस्रो खेलमा जर्मनीविरुद्ध ४० (२९) रन बनाए । त्यसपछि वृत्यले बहराइनविरुद्ध ८४ (५२) रन बनाए । बहराइनविरुद्ध खेलको तथ्यांक हेर्दा यूएई २ रनले पराजित भएको थियो । तर खेलको एक अवस्थामा यूएई प्रतियोगिताबाट बाहिरिने संघारमा थियो । वृत्यको विष्फोटक ब्याटिङको मदतले यूएई जेनतेन सेमिफाइनलमा स्थान बनाउन सफल रहयो ।

वृत्यले बहराइनविरुद्ध खेलेको अन्तिम ९ बलमा ३७ रन बनाए । उनले अन्तिम ओभरमा एक्लै २४ रन बनाए र युएईलाई रन रेटमा माथि राख्दै समूहको दोस्रो स्थानमा ल्याए । यो नतिजाले यूएई समूहमा आयरल्यान्डभन्दा पछि पर्दै दोस्रो स्थानमा रह्यो । यसको मतलब यूएईले सेमिफाइनलमा नेपालसँग सामना गर्नुपर्ने भयो, जुन विश्वकपको स्थानको निर्णायक खेलको रुपमा पनि थियो ।

बहराइनविरुद्धको खेल युएईका लागि प्रतियोगितामा सबैभन्दा महत्त्वपूर्ण खेलमध्येको एक भएको वृत्यको भनाइ छ। ‘मलाई लाग्छ त्यो मैले खेलेको सबैभन्दा महत्त्वपूर्ण खेल थियो । किनभने हामी छनोटबाट पनि बाहिरिने अवस्था थियो,’ उनले भने ।

‘इमान्दारीपूर्वक भन्नुपर्दा, यो प्रतियोगिताको सबैभन्दा महत्त्वपूर्ण क्षण थियो । हामीलाई छनोट हुन अन्तिम ओभरमा १२ रन र जित्न २७ रन आवश्यक थियो । त्यो चरणमा म जितबारे सोचिरहेको थिइनँ । पहिले हामीलाई सेमिफाइनलमा छनोट हुन आवश्यक थियो । छनोट पक्का भएपछि मैले थप दुई छक्का प्रहार गरें । त्यसपछि जित्ने प्रयास गर्यौं, तर अन्त्यमा दुई रनले हार्न पुग्यौं,’ उनले थपे ।

आफ्नो उत्कृष्ट इनिङका साथ यूएईलाई सेमिफाइनल पुर्याउनका बाबजुद वृत्य पेभेलियन फर्कने क्रममा निराश थिए । जब उनका टोलीका सहकर्मी प्रशंसा गरिरहेका थिए, वृत्य जित हासिल गर्न नपुगेकोमा दुःखी थिए । म्याच जित्नेबारे के सोच थियो भन्ने प्रश्नमा वृत्यले जवाफ दिए, ‘मलाई लाग्छ, जित्न सक्थ्यौं । मलाई आफुमा विश्वास थियो । मलाई मेरो टिममा विश्वास थियो । किनभने हामी धेरै तलसम्म ब्याटिङ गर्छौं । हारे पनि हामीले २ रनले हार्यौं र त्यो अवस्थाबाट चरणबाट दुई रनले हार्दा मलाई कुनै दुख छैन । किनभने हामीलाई छनोट हुनु थियो । त्यो हाम्रो मुख्य लक्ष्य थियो । ‘

नेपालविरुद्ध सेमिफाइनलमा युएईको सुरुवात खराब रह्यो । दोस्रो ओभरमा मात्र ६ रन छँदा चिराग सुरी आउट भएपछि वृत्य क्रिजमा आए । उनले अघिल्लो दिन बहराइनविरुद्ध खेलेकै लयलाई निरन्तरता दिए । चौथो ओभरमा जितेन्द्र मुखियाको ओभरमा वृत्यले १८ रन बनाए । त्यसपछि उनले अर्को दुवै ओभरमा १-१ चौका र छक्का जोडे । नेपालका कप्तान सन्दीप लामिछानेले आठौं ओभरमा वृत्यलाई आउट गरेपनि उनीबाट ठूलो क्षति भइसकेको थियो । उनले २३ बलमा ४६ रन जोड्दै ठूलो स्कोरका लागि बलियो आधार बनाए ।

वृत्यले नेपालविरुद्ध रन बनाउन चाहेको र धेरै समय पनि खेर फाल्न नहुने बुझेका थिए । उनले नेपालविरुद्धको रणनीतिको व्याख्या गर्दै भने, ‘नेपालविरुद्धको इनिङ्स निकै महत्त्वपूर्ण थियो किनभने मैले आधार खडा गर्नु थियो। म लयमा रहेको ब्याट्सम्यान हुँ । हामीले सुरुवातमै विकेट गुमायौं र म माथि जिम्मेवारी थियो । त्यसैले म सस्तोमा फर्कन चाहन्नथें । त्यो दिन सबै ठिक भयो। त्यसैले यो त राम्रो दिनको कुरा हो,’ वृत्यले मुस्कुराउँदै भने ।

अहमद रजाले दोस्रो इनिङ्समा ५ विकेट लिएर म्यान अफ द म्याचको अवार्ड पाए। तर, वृत्यले सुरुमै क्षति पुर्याएर खेल नेपालबाट खोसे । फाइनलमा वृत्यले रन थप्न सकेनन्, तर टोलीले मुख्य लक्ष्य हासिल गर्यो । युएईले दुई साताको अन्तरमा तेस्रो पटक आयरल्यान्डलाई पराजित गर्दै प्रतियोगिताको उपाधि उचाल्यो ।

वृत्यले नेपाललाई विश्वकपमा स्थानबाट बन्चित गरेको यो पहिलो पटक भने होइन । सन् २०१९ मा युएईको यू–१९ ले वर्षा बाधक बनेको खेलमा नेपाललाई डी/एल पद्दतिबाट मात्र १ रनले हराउँदा उनी तगारो बनेका थिए । राउण्ड रोबिन लिगको आधारमा भएको प्रतियोगितामा नेपालको एक मात्र हार त्यहि थियो । उक्त छनोटमा यूएई अपराजित रहँदै विश्वकपमा छनोट भएको थियो । कोभिड-१९ का कारण सन् २०२१ को छनोट खेलहरू रद्द भएपछि युएईलाई यू-१९ विश्वकप खेल्ने अर्को मौका दिइयो । नेपालले छनोट नै खेल्न पाएन ।

नेपाल विरुद्धको त्यो खेल वृत्यलाई अझै याद छ । मलेसियाको किनरारा ओभलमा समर्थकको ठूलो भिडको साथमा नेपाल उत्कृष्ट स्थितिमा थियो । वृत्य उक्त खेलमा अंश टन्डनसँगको साझेदारी निर्णायक साबित भएको महसुस गर्छन् ।

‘हो, मलाई त्यो खेल स्पष्ट रूपमा याद छ । इमानदारीपूर्वक भन्नुपर्दा, त्यो सायद मैले खेलेको उत्कृष्ट खेलहरूमध्य एक हो । मलाई लाग्छ, हामीले २ सय ५० आसपासको लक्ष्य पछ्याउँदै थियौं । म ब्याटिङमा जाँदा २१-२ को स्थिति थियो । म ब्याटिङमा जाँदा पानी पर्ने हो कि होइन थाहा थिएन ।’

‘नेपालको फ्यान धेरै थिए । मलेसियामा खेल भएपनि हामी नेपालमा खेल्दैछौं जस्तो लाग्यो । नेपाली समर्थकहरु पूरा समय चिच्याइरहेका थिए । हामीले बाउन्ड्री प्रहार गर्दा भने माहोल शान्त हुन्थ्यो । त्यसको दबाब पनि थियो । नेपालको फिल्डिङ पनि राम्रो थियो ।’

‘त्यसैले हामीले समय बिताउनु आवश्यक थियो । मैले अंशसँग पनि यही कुरा गरेको थिएँ । हाम्रो राम्रो साझेदारी थियो । हामीले त्यहाँ धेरै समय बितायौं र त्यो दिन मलाई लाग्छ नेपाल उत्कृष्ट लयमा थियो । मलाई लाग्छ कि साझेदारी महत्त्वपूर्ण थियो र वर्षाले पनि भूमिका खेलेको थियो। अन्त्यमा हामी छनोट भयौं । ‘

‘मलाई लाग्छ हामी वर्षाअघिको २ बलमा १५ रनले अघि थियौं । अंश अन्तिम बलमा आउट भए र खेल त्यो अवस्थामा पुग्यो । तर तपाईंलाई यसले राम्रो महसुस गराउँछ भने, वर्षा हुनुअघि हामी १५ रनले अगाडि थियौं ।’

वृत्य नेपाललाई एसोसिएट क्रिकेटमा सबैभन्दा बलियो टोली मान्छन् । ‘मलाई लाग्छ नेपाल सधैं बलियो टोली मध्येको एक हो। तपाइँलाई थाहा छ जब हामी कुनै प्रतियोगिता खेल्छौं, हामी नेपाल कुन समूहमा छ भनेर हेर्छौं । नेपाल बलियो टोली मध्ये एक हो । उनीहरु कडा परिश्रम गर्छन् र उनीहरुको दिन आउनेमा म विश्वस्त छु,’ उनले थपे।

वृत्यको परिवार पनि खेललाई लिएर सहयोगी भएकाले उनको निरन्तर प्रगति भएको छ । उनीहरूले वृत्यको खेल हेर्ने अवसर बिरलै गुमाउँछन्। ओमानमा, उनकी आमा प्रतियोगिताभर दर्शकको क्षेत्रमा थिइन् । फाइनलअघि बिदा नपाएर उनका बुवाले रातभर ६ घण्टा गाडी चलाएर ओमान आइपुगे । फाइनलमा वृत्यले रन बनाएनन्, तर सर्वोत्कृष्ट खेलाडी अवार्ड लिँदा उनका बुबा आफ्नो मोबाइलले छोराको भिडियो लिँदै थिए ।

आफ्नो यात्राको मेरुदण्ड आफ्नो परिवारको सहयोग रहेको वृत्यलाई लाग्छ। ‘मलाई लाग्छ मेरो परिवारले मलाई पहिलो दिनदेखि नै साथ दिनुभएको छ। उहाँहरूले मलाई सधैं साथ दिनुभयो । उहाँहरु मलाई मैदानमा लानुहुन्छ । सधैं खेलको बारेमा कुरा गर्नुहुन्छ । विशेषगरी मेरो बुबा र आमा।’

‘आज मेरो बुबा यहाँ हुनुहुन्छ भन्ने पनि थाहा थिएन । हिजो बिदा पाउन नसक्दा फाइनल हेर्न ६ घण्टा गाडी चलाएर आउनुभएछ । त्यसैले तपाईले भन्न सक्नुहुन्छ, उहाँहरु धेरै सहयोगी हुनुहुन्छ,’ वृत्यले फाइनलपछि भने।

वृत्य पछिल्लो समय यूएईको सफलताको श्रेय ड्रेसिङ रुममा सिनियर र जुनियरको तालमेलका कारण सफल भएको मान्छन् । ‘टोलीको मनोबल उच्च छ । ड्रेसिङ रुममा सबैजना राम्रो छन् । जुनियरहरूलाई समर्थन गर्ने सिनियर खेलाडीहरू छन्, तपाईंलाई थाहा नै छ। विशेष गरी अहमद, जहुर र रोहन अविश्वसनीय थिए,’ उनले थपे।

वृत्य आबुधाबी टि१० लिगमा पुणे डेभिल्सको टोलीमा थिए । यो प्रतियोगिताले यूएई क्रिकेटलाई ठूलो मञ्चमा खेल्ने आत्मविश्वास जगाउन मद्दत गरेको उनको विश्वास छ । ‘पक्कै पनि यस्ता प्रतियोगिताले हामीलाई सहयोग गरेको छ। हामीले पूर्ण सदस्य राष्ट्रका खेलाडीहरूसँग खेल्न पाउँछौं । यसले हामीलाई आत्मविश्वास दिन्छ । यस प्रतियोगिताको प्रदर्शनमा पनि त्यो देख्न सकिन्छ,’ उनले अन्त्य गरे।

शनिबार नामिबियाविरुद्धको एकदिवसीय अन्तर्राष्ट्रिय खेलमा वृत्यले आफ्नो पहिलो शतक प्रहार गरे । उनी फेब्रुअरी महिनाका लागि आईसीसीको उत्कृष्ट खेलाडी अवार्डमा मनोनित पनि भएका थिए । भारतका श्रेयस ऐरले वृत्य र नेपालका दीपेन्द्रसिंह ऐरीलाई पछि पार्दै अवार्ड जिते । यूएई विश्वकपका लागि छनोट भएपछि वृत्यमाथि विश्वव्यापी नजर रहनेछ । जसरी उनी खेलिरहेका छन्, वृत्यलाई खलनायकको सूचीमा राख्ने नेपालजस्ता अन्य धेरै टोली हुनेछन् ।