काठमाडौं (हाम्रो खेलकुद) – ब्याटिङमा उत्कृष्ट प्रदर्शन गरेपनि बलिङ नचल्दा नेपाल पपुवा न्युगिनीले दोस्रो ओडिआई खेलमा ३ विकेटले पराजित भएको छ । योसँगै दुई ओडिआई खेलको सिरिज भ्रमण टोली पपुवा न्युगिनीले २–० ले जित्दै क्लिनस्विप गरेको छ ।

२ सय ७९ रनको विजयी लक्ष्य पछ्याएको पपुवा न्युगिनीले ४८.४ ओभरमा ७ विकेट गुमाउँदै पूरा गर्यो । पपुवा न्युगिनीको जितमा लेगा सियाकाले १ सय २ बलमा १२ चौका र १ छक्कासहित सर्वाधिक ९० रनको योगदान दिए । सियाका ओडिआईमा दोस्रो शतक प्रहार गर्न १० रनले चुके ।

स्पिनर पवन सरार्फको ३३ औं ओभरको चौथो बलमा सियाका बोल्ड आउट भएका थिए । राइली हेकुरेले ४५ बलमा ३ चौका र २ छक्कासहित ४८ रनमा अविजित रहँदै जित दिलाए । चाद सोपरले पवन सरार्फलाई विजयी छक्का प्रहार गरेका थिए । सोपर १२ बलमा १ चौका र १ छक्कासहित १६ रनमा अविजित रहे ।

चौथो विकेटका लागि सेसे बाउ र लेगा सियाकाले १ सय १० रनको कीर्तिमानी शतकीय साझेदारी गर्दै पपुवा न्यगिनीलाई जितको आधार तय गरेका थिए । पपुवा न्युगिनीबाट सियाका र बाउ ओडिआईमा शतकीय साझेदारी गर्ने पहिलो जोडी बनेका छन् । नेपाललाई तीव्र गतिका सोमपाल कामीले दोस्रो ओभरमै लगातार दुई विकेटका साथ उत्कृष्ट सुरुवात दिलाएका थिए ।

दोस्रो बलमा ओपनर टोनी उरा कुशल भुर्तेलबाट मिडअनमा ९ रनमा क्याच भए । लगत्तै अर्को बलमा असाद भाला आरिफ शेखबाट शून्यमा क्याच भए । तेस्रो विकेटका चाल्र्स अमिनी लेगा सियाकाले ६९ रनको साझेदारी गर्दै इनिङ उकासे । १३ औं ओभरको पहिलो बलमा सन्दीपले अमिनीलाई ३५ रनमा एलबीडब्लू आउट गर्दै आफ्नो ओडिआई करिअरको ५० औं विकेट पूरा गरे । उनी नेपालबाट ओडिआईमा ५० विकेट लिने पहिलो बलर हुन् । २२ खेलमा ५० विकेट लिने विश्वकै दोस्रो ओडिआई बलर बने ।

सेसे बाउलाई पवनले ३८ रनमा एलबीडब्लू आउट गरे । उनले ६९ बलमा २ चौका प्रहार गरे । हिरी हिरी १३ र नर्मन भानुवा ११ रनमा आउट भए । नेपालका कप्तान सन्दीप लामिछानेले १० ओभरमा ५४ रन खर्चेर १ विकेट लिए । सोमपाल कामीले ९ ओभरमा १ मेडनसहित ३८ रन खर्चेर ३ विकेट लिए । पवन सरार्फले ८.४ ओभरमा १ मेडनसहित ४५ रन खर्चेर २ विकेट लिए ।

त्यसअघि टियु क्रिकेट मैदानमा टस जितेर पहिला ब्याटिङ थालेको नेपालले निर्धारित ५० ओभरमा ८ विकेट गुमाउँदै २ सय ७८ रन बनाएको थियो । नेपालका दीपेन्द्रसिंह ऐरीले १ सय ४० बलमा ७ चौकासहित सर्वाधिक १ सय ५ रनको शतकीय इनिङ खेलेपनि टोलीको हार भने टार्न सकेनन् । दीपेन्द्रले १ सय ३६ बलमा ६ चौकासहित आफ्नो करिअरको पहिलो अन्तर्राष्ट्रिय शतक पूरा गरेका थिए ।

युवा ब्याटर देव खनाल ८६ बलमा ४ चौका र ३ छक्कासहित ७२ रनमा आउट भए । करिअरको दोस्रो अन्तर्राष्ट्रिय खेल खेलेका देवले ७२ बलमा २ चौका र ३ छक्कासहित अर्धशतक पूरा गरेका थिए ।

देवले २४ औं ओभरको अन्तिम बलमा नर्मन भानुआलाई डिप मिडविकेटमा सानदार छक्का प्रहार गर्दै अर्धशतक पूरा गरे । देव स्पिनर चाल्र्स अमिनीको बलमा बलमा एलबीडब्लू आउट भए । दुबै ओपनर ५ रनमा गुमाएको अवस्थामा देव खनाल र दीपेन्द्रसिंह ऐरीले तेस्रो विकेटका लागि १ सय २९ रनको कीर्तिमानी साझेदारी गरेपछि नेपालले मजबुत ब्याटिङ गरेको थियो ।

जुन ओडिआईमा नेपालबाट बनेको कुनैपनि विकेटका लागि उच्च साझेदारी हो । नेपालबाट यसअघि पाँचौं विकेटकालागि शुक्रबार पपुवा न्युगिनीविरुद्ध आरिफ शेख र रोहित पौडेलले १ सय ४ रनको उच्च शतकीय साझेदारी गरेका थिए ।

ओपनर कुशल भुर्तेल रोयल डक आउट (इनिङको पहिलो बलमै आउट ) भए । तीव्र गतिका एलि नाओको पहिलो ओभरको पहिलो बाउन्सर बलमा कुशल सट लेगमा लेगा सियाकाबाट क्याच आउट भए । नाओको नै तेस्रो ओभरको पहिलो बलमा विकेटकिपर अनिल शाह १ रनमा विकेटकिपर सिमोन अतिबाट क्याच भए ।

चौथो विकेटका लागि रोहित र दीपेन्द्रले ५८ रनको साझेदारी गरे । रोहित ४० औं ओभरमा ठूलो सट खेल्ने धुनमा मिस हुँदा ३५ रनमा बोल्ड आउट भए । रोहितले ३६ बलमा ३ चौका प्रहार गरे । भीम सार्की १९ बलमा १ चौका र १ छक्कासहित २६ रनमा आउट भए ।

आरिफ शेख ४ र पवन सरार्फ शून्यमा आउट भए । सन्दीप लामिछाने ९ बलमा २ चौका र १ छक्कासहित २४ रनमा अविजित रहे । सोमपाल कामी ३ रनमा अविजित रहे ।

पपुवा न्युगिनीका एली नाओले ९ ओभरमा १ मेडनसहित ४८ रन खर्चेर ३ विकेट लिए । नर्मन भानुवाले १० ओभरमा ६४ रन खर्चेर २ विकेट लिए । चाद सोपर र चाल्स अमिनीले १–१ विकेट लिए । दुई ओडिआई खेलको सिरिजमा नेपाल पहिलो खेलमा ६ रनले पराजित भएको थियो । अव नेपाल, मलेसिया र पपुवा न्युगिनीबीच त्रिकोणात्मक टि२० आई सिरिज हुनेछ । नेपालले सोमबार पपुवा न्युगिनीसँग खेल्नेछ ।