काठमाडौं (हाम्रो खेलकुद) – नेपाली क्रिकेट टोलीका युवा ओपनर कुशल भुर्तेलले अन्तर्राष्ट्रिय टि२० क्रिकेट (टि२० आई) मा विश्व कीर्तिमान बराबर गरेका छन् । कुशल त्रिकोणात्मक टि२० आई सिरिज अन्तर्गत सोमबार पहिलो खेलमा पपुवा न्युगिनीविरुद्ध २० रनमा आउट भएका थिए । सुरुवाती २ रन जोड्दा कुशलले १२ टि२० आई इनिङमा करिअरको ५ सय रन पूरा गरेका थिए ।

कुशलले टि२० आईमा सर्वाधिक छिटो ५ सय रन पूरा गर्ने कीर्तिमान बराबर गरेका हुन् । कुशलले इंग्ल्यान्डका बायाँ हाते स्टार ब्याटर डेविड मलान र अफगानिस्तानका युवा स्टार हज्रतुल्लाह जजाईसँगको विश्व कीर्तिमान बराबर गरेका हुन् । कुशल अघि टि२० आईमा मलान र जजाईले पनि सुरुवाती १२ इनिङमा ५ सय रन पूरा गरेका थिए ।

भारतीय ओपनर लोकेश राहुल, विराट कोहली, रोहित शर्मा, वेस्टइन्डिजका क्रिस गेल, पाकिस्तानका बाबर आजम, अष्ट्रेलियाका ग्लेन म्याक्सवेल र आरोन फिन्च जस्ता विश्व चर्चित खेलाडीले हात पार्न नसकेको उपलब्धी कुशलले पारेका हुन् । राहुलले १३ इनिङमा पूरा गरेका थिए । उनी सबैभन्दा छिटो ५ सय रन पूरा गर्ने खेलाडी सुचिमा दोस्रो स्थानमा छन् ।

विराट कोहलीले १६, युवराजसिंहले १७ इनिङमा उक्त आँकडा पूरा गरेका थिए । बाबर र अष्ट्रेलिया कप्तान अरोन फिन्चले १५–१५ इनिङमा यस सफलता हात पारेका थिए । अन्य खेलाडी भने पछि छन् । कुशलले गतवर्ष नेदरल्यान्ड्सविरुद्ध टि२० आईमा डेब्यू गरेका थिए । कुशल डेब्यू सहित सुरुवाती तीन खेलमा लगातार तीन अर्धशतक प्रहार गर्ने विश्वकै पहिलो खेलाडी हुन् ।

आसिफ शेख र कुशल दुवै डेब्यू खेलमा शतकीय साझेदारी गर्ने पहिलो खेलाडी समेत हुन् । सुरुवाती दुवै खेलमा ओपनिङमा शतकीय साझेदारी गर्ने विश्वकै पहिलो जोडी समेत हुन् । कुशलले १२ टि२० आई खेलमा १ शतक र ५ अर्धशतक सहित कुल ५ सय १८ रन बनाएका छन् । कुशल नेपालबाट ५ सय माथि टि२० आईमा रन बनाउने चौथो खेलाडी हुन् ।

पारस खड्का, दीपेन्द्रसिंह ऐरी र ज्ञानेन्द्र मल्लले टि२० आईमा ५ सयमाथि रन बनाइसकेका छन् । उनले अघिल्लो महिना ओमानमा आइसिसी टि२० विश्वकप छनोटमा ए मा फिलिपिन्सविरुद्ध १ सय ४ रनको शतकीय इनिङ खेलेका थिए । जुन नेपालबाट टि२० आईमा तेस्रो र भुर्तेलको अन्तर्राष्ट्रिय पहिलो शतक थियो । भुर्तेल अघि नेपालबाट पारस खड्का र ज्ञानेन्द्र मल्लले टि२० आईमा शतक प्रहार गरेका थिए ।

कुशल जीवनी पढ्नुहोस् : अवसरमा कुशलले देखाएको कौशल