काठमाडौं (हाम्रो खेलकुद) – नेपालले त्रिकोणात्मक टि२० आई सिरिजको दोस्रो खेलमा बुधबार मलेसियासँग खेल्नेछ । खेल दिउँसो १२:३० बजे टियु क्रिकेट मैदानमा सुरु हुनेछ । नेपाल र मलेसिया दुवैले त्रिकोणात्मक टि२० आई सिरिजमा विजयी सुरुवात गरेका छन् ।

नेपालले पपुवा न्युगिनीलाई १५ रनले पराजित गरेको थियो । मलेसियाले पपुवा न्युगिनीलाई ८ रनले हराएको थियो । नेपाल बुधबार मैदान प्रवेश गर्दा बलिङ सुधारमा ध्यान दिनेछ । नेपालले पपुवा न्युगिनीसँग दुवै ओडिआई खेलमा कमजोर बलिङको कारण हारेको थियो । पहिलो खेलमा टि२० आईमा पनि धौधौ परेको थियो ।

पहिलो टि२० खेलमा नेपालले निर्धारित २० ओभरमा ९ विकेट गुमाउँदै १ सय ८४ रन बनाएको थियो । पपुवा न्युगिनी १९.२ ओभरमा १ सय ६८ रनमा अल आउट भएको थियो । आक्रामक ब्याटिङ गरेका नर्मन भानुवालाई १९ औं ओभरको पाँचौं बलमा करण केसीले आउट गरेपछि नेपालको जित पक्का बनेको थियो । उनी टिकेको खण्डमा पपुवा न्युगिनीको पक्षमा जान सक्ने देखिएको थियो ।

बलिङ र फिल्डिङ नेपालले कमजोर गरेको थियो । बलिङ र फिल्डिङ सुधार नगरे मलेसियाले नेपाललाई घरेलु मैदानमा स्तब्ध पार्न सक्छ ।
नेपालले कमजोर बलिङ गरेपछि पपुवा न्युगिनीले पहिलो ओडिआई खेलमा आफ्नो इतिहासकै सर्वाधिक २ सय ९२ रनको योगफल बनाएको थियो । रोहित पौडेलले १ सय २६ रनको शतकीय इनिङ खेलेपनि हार टार्न सकेनन् ।

दोस्रो खेलमा दीपेन्द्रसिंह ऐरीको १ सय ५ रनको सहयोगमा २ सय ७८ रन बनाएपनि नेपालले योगफल बचाउन सकेको थिएन । त्यसैले नेपालले मलेसियाविरुद्ध बलिङ सुधार गर्नुपर्ने हुन्छ । मलेसियाले पहिलो खेलमा उत्कृष्ट बलिङ र फिल्डिङका साथ पपुवा न्युगिनीलाई स्तब्ध पार्दै जित निकाल्दै नेपाललाई दबाबमा राखेको छ । नेपालले तीनै खेलमा प्रमुख ३ बलर मैदान उतारेको थियो । सोमपाल कामी, करण केसी र सन्दीप प्रमुख बलर हुन् । अन्य ओभर अलराउन्डरबाट पूरा गर्दै आएको छ । प्रमुख बलरको प्रदर्शन भने अपेक्षा अनुसार हुन सकेको छैन ।

कप्तानी सन्दीपले पनि बलिङमा केहि सुधार गर्नुपर्ने बताउँछन् । ‘नर्मनलेनै सबै कुरा पल्टाए कहिले काहिँ योजनाले काम गर्दैन । हामीले योजनाहरुमा धेरै कुराहरु छोडेका छौं । बलिङ क्षेत्रमा हामीहरुले केहि कुरामा सुधार गर्नुपर्नेछ’, पहिलो जितपछि सन्दीपले भनेका थिए ।
नेपाली बलरले तीनै खेलमा अपेक्षा अनुसार प्रदर्शन गर्न सकेका छैनन् । प्रमुख बलरको प्रदर्शन नै अपेक्षा र क्षमता अनुसार हुन सकेको छैन । सन्दीप भने विकेट(पिच) को कारण त्यसो भएको बताउँछन् ।

‘ब्याटिङ विकेट एकदमै राम्रो छ । योजनहरु एकदुई वटा तलमाथि भएको छ । घरेलु मैदानमा खेल्नुअघि हाम्रो पनि ब्याटिङ तलमाथि भएको थियो । वहाँ आएपछि राम्रो भएको छ । पिच जुन तरिकाले बनेको छ त्यो अनुसार रन बनाउन सहज छ’, सन्दीपले भने । सन्दीपले खेलाडीबाट साथ नपाउनु भएको हो भन्ने प्रश्नमा भने ठाँडै अस्वीकार गरे ।

नेपालले मलेसियाविरुद्ध स्पिनर सागर ढकाललाई मौका दिनेछ । उनलाई नेपालले आरिफ शेख वा पवन सरार्फ मध्य एकलाई बेन्चमा राख्नसक्छ । बलिङ आक्रामण बलियो बनाउन नेपालले एक स्पिनर आवश्यक पनि देखिन्छ । मलेसिया र नेपालबीच हालसम्म ७ टि२० आई खेल भएका छन् । जसमा नेपाल ६ खेलमा विजयी हुँदा १ खेलमा पराजित भएको छ ।

गत वर्ष त्रिकोणात्मक सिरिजमा नेपालले मलेसियालाई दुवै खेलमा पराजित गरेको थियो । २०२० को एसिया कप छनोटको इस्टर्न रिजनमा छनोटमा मलेसियाले नेपाललाई २२ रनले हराएको थियो । उक्त खेलमा नेपाललाई हराउन शर्विन मुनीआन्दीले ४ विकेट लिँदै प्लेयर अफ द म्याच चुनिएका थिए ।

पपुवा न्युगिनीलाई हराउन पनि शर्विनले ४ विकेट लिँदै प्लेयर अफ द म्याच चुनिएका थिए । तीव्र गतिका बलर मुनीआन्दी इपिएलमा भैरहवा ग्ल्याडियटर्समा अनुबन्ध भएका थिए । चितवन टाइगर्सबाट इपिएल खेलेका विरनदीप सिंह मलेसिया प्रमुख हतियार हुन् । उनले पपुवा न्युगिनीविरुद्ध ५९ रनको अविजित इनिङ खेलेका थिए । शर्विन र विरनदीप प्रमुख हतियार हुन् । विरनदीप ब्याटिङमा नेपाललाई घातक बन्नसक्छन् ।

मलेसियाले गत वर्ष नेपाल र नेदरल्यान्ड्ससँगको त्रिकोणात्मक सिरिजपछि पहिलो अन्तर्राष्ट्रिय खेल खेल्दैछ । सैद अजिज, विरनदीप सिंह , अहमद फैज ब्याटिङ हतियार हुन् । बायाँ हाते स्पिनर पवन दिपसिंह पनि टाउको दुखाईको बलर बन्न सक्छन् । तीव्र गतिका बलरमा शर्विन र मोहम्मद वाफिक उसका हतियार हुन् । मलेसियाले नेपाललाई राम्रो चुनौती दिने अनुमान गरिएको छ ।