काठमाडौं (हाम्रो खेलकुद) – मलेसियाले त्रिकोणात्मक टि२० आई सिरिजमा घरेलु टोली नेपाललाई १ सय १५ रनको सामान्य विजयी लक्ष्य दिएको छ । टियु क्रिकेट मैदानमा टस जितेर पहिला ब्याटिङ थालेको मलेसियाले निर्धारित २० ओभरमा ८ विकेट गुमाउँदै १ सय १४ रन बनायो ।

मलेसियाका ओपनर ओपनर जुबैदी जुल्किफ्लले १५ बलमा ३ चौका र २ छक्कासहित सर्वाधिक ३२ रनको योगदान दिए । नेपालका तीव्र गतिका बलर करण केसीले पहिलो ओभरको पहिलो बलमै मलेसिया ओपनर तथा प्रमुख ब्याटर विरनदीप सिंहलाई शून्यमा बोल्ड आउट गर्दै राम्रो सुरुवात दिलाएका थिए ।

दोस्रो विकेटका लागि जुबैदी र कप्तान अहमद फैजले ४९ रनको साझेदारी गरेका थिए । बायाँ हाते स्पिनर कुशल मल्लले जुबैदीलाई सातौं ओभरको पाँचौं बलमा जुबैदीलाई बोल्ड गर्दै दोस्रो सफलता दिलाए । मलेसिया मध्यक्रमका प्रमुख ब्याटर सैद अजिज १४ रनमा क्याच आउट भए । दीपेन्द्रसिंह ऐरीको १२ औं ओभरको सुरुवाती चार बल लगातार डट खेलेका अजिज पाँचौं बलमा मिडअनमा सन्दीपबाट क्याच भए ।

डटको दबाबका उनले विकेट दिएका थिए । दीपेन्द्रले उक्त ओभर विकेट मिडन राखेका थिए । अर्को ओभरमा सन्दीपको बलमा कप्तान अहमद फैज लङअफमा कुशल मल्लबाट २४ रनमा क्याच भए । उनले ३८ बलमा ३ चौका प्रहार गरे ।

तल्लोक्रमका शर्विन मुनीआन्दी ९, मोहम्मद आमिर १६, एनुल हफिज ९ र विजयी उन्नीले ३ रन बनाए । नेपालका कप्तान सन्दीप लामिछानेले ४ ओभरमा २७ रन खर्चेर २ विकेट लिए । करण केसीले ३ ओभरमा १६ रन खर्चेर २ विकेट लिए । अभिनाश बोहरा, दीपेन्द्रसिंह ऐरी र कुशल मल्लले १-१ विकेट लिए ।