काठमाडौं (हाम्रो खेलकुद) – नेपालका तीव्र गतिका बलर करण केसीले टि२० आई खेलमा ५० औं विकेट पूरा गरेका छन् । करणले त्रिकोणात्मक टि२० आई सिरिजमा पपुवा न्युगिनीविरुद्ध दोस्रो खेलमा पहिलो ओभरमा लेगा सियाकाको विकेट लिँदै ५० विकेट पूरा गरेका हुन् ।

करण नेपालबाट टि२० आईमा ५० विकेट पूरा दोस्रो खेलाडी हुन् । करणले पहिलो ओभरको चौथो बलमा सियाकालाई आसिफ शेखबाट क्याच गराउँदै पूरा गरेका थिए । करणले ३६ खेलमा ५० विकेट पूरा गरेका हुन् । यो नेपालको पनि ५० औं टि२० आई खेल हो । करण अघि सन्दीपले ३६ खेलमानै ६७ विकेट लिएका छन् ।

करणले २०१५ मा नेदरल्यान्ड्सविरुद्ध टि२० आईमा डेब्यू गरेका थिए । करणको टि२० आईमा उत्कृष्ट प्रदर्शन २०१९ मा नेदरल्यान्ड्सविरुद्ध ३.३ ओभरमा १७ रन खर्चेर ४ विकेट लिएका थिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको नेपालले निर्धारित २० ओभरमा ७ विकेट गुमाउँदै २ सय ३ रन बनाएको थियो । नेपालका दीपेन्द्रसिंह ऐरीले ३३ बलमा ३ चौका र ४ छक्कासहित सर्वाधिक ६६ रनको योगदान दिए । डेब्यू खेल खेलेका आदिल अन्सारीले ११ बलमा १ चौका र ३ छक्कासहित ३३ रनको विष्फोटक इनिङ खेले । चौथो विकेटका लागि दीपेन्द्र र आदिलले ७६ रनको साझेदारी गरेका थिए ।