काठमाडौं (हाम्रो खेलकुद) – युवा अलराउन्डर आदिल अन्सारीले त्रिकोणात्मक टि२० आई सिरिजमा बिहीबार पपुवा न्युगिनीविरुद्ध डेब्यू गर्दै सानदार प्रदर्शन गरे । उमेर समूहमा विष्फोटक फिनिसरको छवी बनाएका उनले सिनियर टोलीमा पनि त्यसलाई निरन्तरता दिए ।

नेपालले पपुवा न्युगिनीलाई ३७ रनले हराउन उनले तल्लोक्रममा ११ बलमा ३ छक्का र १ चौकासहित कुल ३१ रनको योगदान दिए । नेपालले टियु मैदानमा पहिला ब्याटिङ गर्दै निर्धारित २० ओभरमा ७ विकेट गुमाउँदै २ सय ३ रन बनाएको थियो । आदिलसँगै दीपेन्द्रसिंह ऐरीले ३३ बलमा ३ चौका र ४ छक्कासहित ६६ रनको इनिङ खेलेका थिए ।

आदिलले खेलपछि बोल्दै डेब्यू खेलमै यस किसिमको प्रदर्शन गर्ने नसोचेको बताए । ‘डेब्यूमै यस किसिमको प्रदर्शनले एकदमै खुसी लागेको छ । सोचेको थिइनँ कि डेब्यू खेलमा यस्तो हुन्छ । तर एकदमै आशा बोकेर गएको थिए कि राम्रो गर्छु भनेर’, आदिलले भने ।

आदिलले १९ औं ओभरमा तीव्र गतिका बलर नोसैना पोकनालाई पहिलो बलमा चौका र त्यसपछि लगातार तीन छक्का प्रहार गरेका थिए । उक्त ओभरको पहिलो बल उनले लेग साइडमा चौका प्रहार गरेका थिए । त्यसपछि फुलटस बल आदिलले चोभारतर्फको डिप मिडविकेटमा सानदार छक्का प्रहार गर्दै समर्थकमाझ पुर्याएका थिए । अफसाइडको बललाई उनले एक्स्ट्रा कभरमा छक्का प्रहार गरेका थिए । जुन नो बल थियो । तेस्रो फ्रि हिट बललाई उनले हेलिकप्टर सटमा छक्का प्रहार गरे ।

‘लगातार तीन छक्का हान्ने अवस्था थियो । त्यो समय हान्ने बल पनि पाएँ । त्यो तीन मध्य मलाई सबैभन्दा मन परेको सट हेलिकप्टरनै हो’, आदिलले भने ।

यति चाँडो सिनियर टोलीमा पर्छु जस्तो लागेको थियो भन्ने प्रश्नमा उनले भने, ‘यस्तो त लागेको थिएन । तर मिहिनेत पहिला देखि गरेको थिएँ । मिहिनेतको सफलता पाएँ । अलि चाँडो भए जस्तो भयो ।’

उमेर समूहमा आदिल विष्फोटक ब्याटिङको रुपमा छवी बनाएका थिए । त्यो छविलाई निरन्तरता दिन उनलाई पनि केहि चुनौती थियो । ‘त्यो छवीलाई निरन्तरता दिन केहि दबाब त थियो । तर मेरो अभ्यासनै त्यस्तै खालको हुन्छ । जाने बितिक्कै हान्ने हुन्छ’, उनले भने

आदिल १५ औं ओभरको दोस्रो बलमा रोहित पौडेल आउट भएपछि क्रिजमा आउट भएका थिए ।’ टिमले मलाई एकछिन खेललाई अघि बढाउने जिम्मेवारी दिएको थियो । दुई तीन ओभर लगेर जाने अनि हान्नी भूमिका थियो,’ उनले भने ।

आदिललाई खेलअघि पूर्व नेपाली खेलाडी तथा वर्तमान समयका प्रमुख छनोटकर्ता दीपेन्द्र चौधरीले डेब्यू क्याप दिएका थिए । उनी टि२० आईमा डेब्यू क्याप पाउने नेपालका ४१ औं खेलाडी हुन् ।

२ सय ४ रनको विशाल विजयी लक्ष्य पछ्याएको पपुवा न्युगिनी १९.४ ओभरमा १ सय ६६ रनमा अल आउट भए । तीव्र गतिका बलर करण केसीले ह्याट्रिक सहित ५ विकेट लिँदै नेपाललाई सहज जित दिलाए । करण टि२० आईमा पाँच विकेट लिने र ह्याट्रिक गर्ने पहिलो नेपाली खेलाडी हुन् ।

करणले २० औं ओभरको दोस्रो बलमा चाद सोपारलाई २ रनमा रोहित पौडेलबाट थर्डमा क्याच गराए । तेस्रो बलमा शिमोन आतीलाई बोल्ड गरे । चौथो बलमा नैसान पोकनालाई मिडअफमा दीपेन्द्रबाट क्याच गराउँदै नेपालबाट पाँच विकेट लिने र ह्याट्रिक गर्ने दुबै पहिलो खेलाडी बनेका थिए ।

पपुवा न्युगिनीका लागि चाल्र्स अमिनीले ४७ बलमा ९ चौकासहित सर्वाधिक ६२ रनको योगदान दिए । टोनी उरा ४३, सेसे बाउ २५ र नोर्मन भानुआले १७ रन बनाए । करण केसीले ३.४ ओभरमा २१ रन खर्चेर ५ विकेट लिए । अभिनाश बोहराले ४ ओभरमा ३४ रन खर्चेर २ विकेट लिए । सोमपाल कामीले ४ ओभरमा ३४ रन खर्चेर २ विकेट लिए ।सन्दीपको नाममा १ विकेट रह्यो ।