एजेन्सी – कप्तान टम लाथमको सानदार शतकमा घरेलु टोली न्युजिल्यान्डले दोस्रो ओडिआई खेलमा नेदरल्यान्ड्सलाई १ सय १८ रनले पराजित गरेको छ ।

जितका लागि २ सय ६५ रनको विजयी लक्ष्य पछ्याएको नेदरल्यान्ड्स ३४.१ ओभरमा १ सय ४६ रनमा अल आउट भयो । नेदरल्यान्ड्सका बास डि लिडेले ५८ बलमा ५ चौकासहित सर्वाधिक ३७ रन बनाए ।

विक्रमजित सिंहले ५१ बलमा ७ चौकासहित ३१ रन बनाए । माइकल रिप्पन १८ र कप्तान पिटर सिलार ९ रनमा आउट भए । न्युजिल्यान्डका माइकल ब्रसवेलले ५ ओभरमा २१ रन खर्चेर ३ विकेट लिए । ईश सोधी र काइल जेमिसनले २–२ विकेट लिए ।

त्यसअघि टस जितेर पहिला ब्याटिङ थालेको घरेलु टोली न्युजिल्यान्डले निर्धारित ५० ओभरमा ९ विकेट गुमाउँदै २ सय ६४ रन बनायो । न्युजिल्यान्डका कप्तान टम लाथमले १ सय २३ बलमा १० चौका र ५ छक्कासहित सर्वाधिक १ सय ४० रनको शतकीय अविजित इनिङ खेले । उनको ओडिआई करिअरको छैटौं र उत्कृष्ट प्रदर्शन हो ।

खराब सुरुवात गर्नेक्रममा एक समय न्युजिल्यान्ड ९.५ ओभरमा ३२–५ को दयनीय अवस्थामा पुगेको थियो । कोलिन डि ग्रान्डहोम १६ रनमा आउट हुँदा २२.५ ओभरमा ८९–६ को अवस्थामा पुगेको थियो । सातौं विकेटका लागि लाथम र डग ब्रसवेलले ९० रनको साझेदारी गर्दै न्युजिल्यान्डको संटक टारेका थिए । ब्रेसवेल ५१ बलमा २ चौका र २ छक्कासहित ४१ रनमा आउट भए । ईश सोधीले १८ रन जोडे ।

नेदरल्यान्ड्सका तीव्र गतिका बलर लोगन भ्यान बीकले १० ओभरमा २ मेडनसहित ५६ रन खर्चेर सर्वाधिक ४ विकेट लिए । फर्द क्लासेनले १० ओभरमा ३६ रन खर्चेर ३ विकेट लिए । पहिलो खेलमा न्युजिल्यान्ड ७ विकेटले विजयी भएको थियो । तेस्रो तथा अन्तिम खेल सोमबार हुनेछ ।