एजेन्सी – ओपनर तथा विकेटकिपर एलिसा हेलीको सानदार विश्व कीर्तिमानी शतकमा अष्ट्रेलियाले न्युजिल्यान्डमा जारी एकदिवसिय महिला विश्वकपको फाइनलमा इंग्ल्यान्डलाई ३ सय ५७ रनको विशाल लक्ष्य दिएको छ ।

क्राइस्टचर्चमा टस हारेर पहिला ब्याटिङ थालेको अष्ट्रेलियाले निर्धाारित ५० ओभरमा ५ विकेट गुमाउँदै ३ सय रन बनायो । यो महिला विश्वकप फाइनलमा बनेको सर्वाधिक ठूलो योगफल हो ।

ओपनर हेलीले १ सय ३८ बलमा २६ चौकासहित १ सय ७० रनको सानदार शतकीय इनिङ खेलिन् । हेलीको अन्तर्राष्ट्रिय करिअरको उत्कृष्ट प्रदर्शन हो । ओडिआई करिअरको पाँचौं शतक हो । जारी विश्वकपमा हेलीको लगातार दोस्रो शतक हो । हेलीले सेमिफाइनलमा वेस्टइन्डिजविरुद्ध १ सय २९ रनको शतकीय इनिङ खेलेकी थिइन् ।

हेलीले महिला र पुरुष दुबै विश्वकप फाइनलमा सर्वाधिक रन बनाउने विश्व कीर्तिमान पनि बनाएकी छिन् । यसअघि विश्वकप फाइनलमा पुरुषको तर्फबाट २००७ को विश्वकपमा अष्ट्रेलिया एडम गिलक्रिष्टले श्रीलंकाविरुद्ध १ सय ४९ रनको शतकीय इनिङ खेलेका थिए ।

अर्की ओपनर राहेल हेन्स ९३ बलमा ७ चौकासहित ६८ रनमा आउट भइन् । पहिलो विकेटका लागि हेन्स र हेलीले २९.१ ओभरमा १ सय ६० रनको शतकीय साझेदारी गर्दै विशाल योगफलको आधार तय गरेका थिए । बेथ मुनीले ४७ बलमा ८ चौकासहित ६२ रन जोडिन् । मेग ल्यानिङले १० र एलिस ऐरीले १७ रन बनाइन् । अन्या श्रुब्सोले ९ ओभरमा ३१ रन खर्चेर ३ विकेट लिइन् ।