एजेन्सी – मध्यक्रमका ब्याटर सूर्य कुमार यादवको अर्धशतकमा मुम्बई इन्डियन्सले इन्डियन प्रिमियर लिग (आइपिएल) २०२२ मा कोलकाता नाइट राइडर्सलाई १ सय ६२ रनको मध्यम लक्ष्य दिएको छ ।

महाराष्ट्र क्रिकेट एसोसियसन पुणेमा टस हारेर पहिला ब्याटिङ थालेको मुम्बईले निर्धारित २० ओभरमा ४ विकेट गुमाउँदै १ सय ६१ रन बनायो । मुम्बईका सूर्य कुमार यादवले ३६ बलमा ५ चौका र २ छक्कासहित ५२ सर्वाधिक रनमा अविजित रहे । सूर्यले जारी सिजनको पहिलो खेल खेल्दै अर्धशतक बनाएका हुन् ।

युवा ब्याटर तिलक बर्मा २७ बलमा ३ चौका र २ छक्कासहित ३८ रनमा अविजित रहे । चौथो विकेटका लागि सूर्य र तिलकले ४९ बलमा ८३ रनको महत्वपूर्ण साझेदारी गर्दै इनिङ उकासेका थिए । ओपनर तथा कप्तान रोहित शर्माले १२ बलमा ३ रन मात्र बनाउन सके । रोहित उमेश यादवको बलमा एज लागेर विकेटकिपर साम बिलिंग्सबाट क्याच भए ।

डेब्यू खेल खेलेका डेवाल्ड ब्रेभिस १९ बलमा २ चौका र २ छक्कासहित २९ रन जोड्दै राम्रो प्रभाव छाडे । उनी स्पिनर बरुण चक्रवर्तीको बलमा विकेटकिपर बिलिंग्सबाट स्टम्पिङ आउट भए । ईशान किशन २१ बल खेल्दै १४ रनमा क्याच भए । अन्तिममा काइरन पोलार्ड ५ बलमा ३ छक्कासहित २२ रनमा अविजित इनिङ खेले ।

कोलकाताका प्याट कमिन्सले ४ ओभरमा ४९ रन खर्चेर २ विकेट लिए । उमेश यादव र बरुण चक्रवर्तीले १–१ विकेट लिए ।